Sırııa boıynsha Astana protsesiniń kelesi raýndy qyrkúıekte ótedi

ASTANA. QazAqparat - Sırııadaǵy ahýaldy retteý jónindegi Astana protsesi aıasyndaǵy kezekti kezdesýdiń naqty datasy bitim rejimine kepilger elderdiń tehnıkalyq kezdesýinen keıin belgili bolady. Bul týraly Úkimet otyrysynan keıin Syrtqy ister mınıstri Qaırat Ábdirahmanov málim etti, dep habarlaıdy QazAqparat.

«Reseılik taraptan alǵan aqparatqa súıensek, bitim jasaý rejimine kepilger elderdiń, ıaǵnı Reseı, Túrkııa jáne Iran tamyzdyń sońyna deıin sarapshylar deńgeıinde tehnıkalyq kezdesý ótkizýge nıetti. Sonyń barysynda kún tártibi aıqyndalyp, Sırııadaǵy ahýaldy retteý jóninde Astana protsesi aıasyndaǵy kezekti kezdesýdiń naqty merzimi belgili bolady. Aldyn ala josparda qyrkúıektiń orta kezi nazarǵa alynýy múmkin», - dedi mınıstr.

Esterińizge sala keteıik, Astanada 4-5 shildede ótken sońǵy raýndta QR Syrtqy ister mınıstri Qaırat Ábdirahmanov Sırııa boıynsha joǵary deńgeıdegi kelesi halyqaralyq kezdesýdi 2017 jylǵy tamyzdyń sońǵy aptasynda ótkizý josparlanyp otyrǵanyn habarlaǵan edi.