Sırııa boıynsha 23-halyqaralyq kezdesý 2025 jyly Astanada ótedi
ASTANA. KAZINFORM – Sırııa boıynsha 23-halyqaralyq kezdesý 2025 jyldyń birinshi jartyjyldyǵynda Astanada ótedi. Bul jaıynda Sırııadaǵy jaǵdaıdy retteýge arnalǵan Astana protsesi aıasyndaǵy 22-halyqaralyq kezdesý qorytyndysynda belgili boldy.
«Astana formatynyń» kepilger elderi — Iran Islam Respýblıkasy, Reseı Federatsııasy jáne Túrkııa Respýblıkasy ókilderi kezdesý qorytyndysyna oraı birlesken málimdeme qabyldady. Onda kelissózge qatysýshylar tarapynyń Astanada Sırııa boıynsha 22-halyqaralyq kezdesýdi ótkizgen Qazaqstanǵa shynaıy rızashylyq bildirgeni aıtylady.
«Astana protsesiniń» bastaýynda turǵan jáne osy biregeı kópjaqty tetiktiń tabysty jumys isteýi úshin únemi óz alańyn usynǵan ári qonaqjaılylyqty qamtamasyz etken Sırııa boıynsha halyqaralyq kezdesýler is-sharalarynyń ıe-eli retindegi Qazaqstan tarabynyń erekshe róli atap ótildi. 2022 jylǵy 19 shildedegi úshjaqty sammıttiń qorytyndy málimdemesinde bekitilgen Reseı Federatsııasynda joǵary deńgeıde kezdesý uıymdastyrý ýaǵdalastyǵy eske saldy. 2025 jyldyń birinshi jartyjyldyǵynda Astanada Sırııa boıynsha 23-halyqaralyq kezdesý ótkizýge ýaǵdalasty», - delingen elimizdiń Syrtqy ister mınıstri orynbasary Álibek Baqaev jarııa etken úshjaqty málimdemede.
Sondaı-aq málimdemede taraptar Taıaý Shyǵystaǵy zorlyq-zombylyqtyń kúsheıýiniń Sırııa Arab Respýblıkasyndaǵy jaǵdaıǵa keri áserin moıyndaıdy. Izraıldiń Sırııadaǵy barlyq áskerı shabýylyn aıyptaıdy.
Bul áreketter Sırııanyń halyqaralyq quqyǵyn, halyqaralyq gýmanıtarlyq quqyǵyn, egemendigi men aýmaqtyq tutastyǵyn buzdy dep sanaıdy. Olardy turaqsyzdandyrýshy jáne aımaqtaǵy shıelenisti kúsheıtýshi dep tanyıdy jáne osy shabýyldardy toqtatýǵa shaqyrady.
Idlıbtiń deeskalatsııa aımaǵynda jáne odan tys jerlerde beıbit turǵyndarǵa qaýip tóndiretin terrorıstik toptardyń bolýy men áreketterine qatty alańdaýshylyq bildiredi. Gýmanıtarlyq jaǵdaıdy qosa alǵanda, Idlıbtiń deeskalatsııa aımaǵyndaǵy jáne onyń aınalasyndaǵy jaǵdaıdy turaqty qalypqa keltirýdi qamtamasyz etý úshin odan ári kúsh salýǵa kelisedi.
Aıta keteıik, kezdesýge qatysý úshin Qazaqstan elordasyna 11 delegatsııa keldi.
Kelissózderdiń jalpy otyrysynda Syrtqy ister mınıstriniń orynbasary Álibek Baqaev ırııadaǵy jaǵdaıdy retteýge arnalǵan Astana protsesi aıasyndaǵy halyqaralyq kelissózderdiń 22-shi raýndy nátıjeli aıaqtalǵanyn málimdedi.
