Sırııa bıligi sodyrlardyń hımııalyq qarý qoldanǵanyn dáleldeıtin aıǵaqtar keltirdi
ASTANA. QazAqparat - Sırııa bıligi Hımııalyq qarýǵa tyıym salý Uıymynyń halyqaralyq mıssııa ókilderine sodyrlardyń ıprıt hımııalyq zattegin qoldanǵanyn dáleldeıtin aıǵaqtardy kórsetti.
Bul týraly RIA Novostı agenttigi Hımııalyq qarýǵa tyıym salý Konventsııasyn júzege asyrý jónindegi Sırııa ulttyq organynyń resmı ókili Sammer Abbasqa silteme jasap habarlady.
«Halyqaralyq mıssııa biz kórsetken barlyq qujattardy tekserdi jáne qabyldady. Mıssııa ókilderi saraptamaǵa jiberetin synamalardy alý úshin Sırııaǵa taǵy da keledi», - dedi ol.
RF Qorǵanys mınıstrliginiń sarapshylary 2016 jyldyń 31 qazanynda Allepo provıntsııasynyń Afrın aýdanynda ornalasqan Marret-Ýmm-Haýsh eldi mekeninde ıprıtpen jaraqtanǵan 240 mıllımetrlik mınomet mınasynyń qoldanylǵany jaıly aıǵaqtar jınady, dep naqtylaı tústi Ulttyq uıym ókili.
Mıssııa tekserý jumystaryn uıymdastyrý úshin tek qujattyq aıǵaqtardy qabyldady, al materıaldyq aıǵaqtar (synamalar - red.) mórlenip, Gaagaǵa charterlik reıspen jetkizý jóninde qarjylyq qıyndyqtar sheshilgenshe sırııalyqtarǵa saqtaı turýǵa berildi. Synamalar shamamen 2017 jyldyń qańtar aıynda jetkizilýi múmkin.
Mıssııa Sırııa bıliginiń resmı ótinimi boıynsha Damaskide 12 jeltoqsannan bastap jumys istedi. Onyń quramynda - AQSh, Ulybrıtanııa, Avstralııa, Slovakııa jáne Slovenııadan kelgen segiz ınspektor bar.
Aıǵaqtardy qabyldaǵan mıssııa ókilderi ázirge eshqandaı pikir bildirgen joq.
