Sırııa bıligi men kúrd kúshteri keshendi kelisimge qol qoıdy
ASTANA. KAZINFORM – Sırııa úkimeti men kúrdter basqaratyn Sırııalyq demokratııalyq kúshter (SDF) atysty toqtatý jáne áskerı ári ákimshilik qurylymdardy memlekettik júıege kezeń-kezeńimen ıntegratsııalaý jóninde keshendi kelisimge keldi. Bul týraly taraptar 30 qańtar kúni málimdedi.
Kelisimge sáıkes, SDF bólimsheleri tolyqtaı shepten áketiledi. Al Sırııa Іshki ister mınıstrligine qarasty qaýipsizdik kúshteri eldiń soltústik-shyǵysyndaǵy ál-Hasaka men ál-Kamyshly qalalaryna engiziledi. Osydan keıin kúrd jáne úkimet kúshterin biriktirý protsesi bastalmaq.
Jospar boıynsha, soltústik-shyǵys óńirde SDF quramynan úsh brıgadadan turatyn jańa áskerı qurylym jasaqtalady, sondaı-aq Aleppo provıntsııasynda SDF-tiń taǵy bir brıgadasy úkimet áskeriniń quramyna qosylady.
Bul kelisim sońǵy qaqtyǵystardan keıin jasaldy. Sol shaıqastar barysynda úkimet áskeri SDF sońǵy on jyldan astam ýaqyt boıy baqylaýda ustap kelgen soltústik-shyǵys aýmaqtyń basym bóligin óz baqylaýyna alǵan.
AQSh-tyń Túrkııadaǵy elshisi ári Sırııa boıynsha arnaıy ókili Tomas Barrak bul ýaǵdalastyqty Sırııanyń ulttyq tatýlasý, birlik jáne uzaq merzimdi turaqtylyqqa jetý jolyndaǵy «irgeli ári tarıhı kezeń» dep atady.
Qujatta kelisimniń basty maqsaty – sırııalyq aýmaqtardy biriktirý jáne múddeli taraptar arasyndaǵy yntymaqtastyqty kúsheıtý arqyly óńirdi tolyq ıntegratsııalaý ekeni aıtylǵan. Sonymen qatar, onda kúrd halqynyń azamattyq jáne bilim berý quqyqtary bekitilip, ishki qonys aýdarǵan azamattardyń óz óńirlerine oralýyna kepildik beriledi. Kúrd ákimshiligine qarasty mekemeler men olardyń qyzmetkerleri de jańa sırııalyq bıliktiń memlekettik qurylymdaryna biriktiriledi.
Kelisimge sáıkes, eldiń soltústik-shyǵysyndaǵy túrmeler, munaı jáne gaz ken oryndary Damask baqylaýyna ótedi. Buǵan deıin sırııalyq ásker eldegi eń iri «Omar» munaı ken ornyn jáne Evfrat ózenindegi strategııalyq mańyzy bar Tabka bógetin baqylaýǵa alǵan.
Aıta keteıik, Sırııanyń ótpeli kezeńdegi prezıdenti Ahmed ash-Sharaa 18 qańtarda SDF-pen atysty toqtatý rejımi týraly kelisimge qol qoıylǵanyn jarııalaǵan bolatyn. Qujat barlyq maıdandar men janasý núktelerinde atysty tolyq ári dereý toqtatýdy kózdeıdi.
Aleppo mańyndaǵy qaqtyǵystar 6 qańtardan beri jalǵasyp, taraptar birin-biri zorlyq-zombylyqty ýshyqtyrdy dep aıyptaǵan. Aleppo gýbernatorynyń málimetinshe, 10 qańtarǵa qaraı negizinen kúrdter turatyn aýdandardan shamamen 155 myń adam qala ishindegi ózge aýdandarǵa nemese aýyldyq jerlerge kóshken.