Sırııa bıligi Es-Sýveıdadan áskerin shyǵara bastady

ASTANA. KAZINFORM — Sırııa úkimeti eldiń ońtústik-batysyndaǵy Es-Sýveıda qalasynan áskerı kúshterdiń shyǵarylǵanyn habarlady, dep habarlaıdy DW.

Úkimet áskeri jergilikti etnıkalyq qaýymdastyq arasyndaǵy qarýly qaqtyǵystarǵa baılanysty aımaqqa jiberilgen.

Damask bıligi drýzdarmen jasalǵan atysty toqtatý kelisimi aıasynda jaýyngerlerdi shyǵara bastady.

— Sırııa armııasy qalany zańsyz toptardan tazartýdy aıaqtaǵannan keıin qabyldanǵan kelisim sharttaryna sáıkes Es-Sýveıda qalasynan áskerlerin shyǵara bastady; polıtsııa kúshteri ony baqylaýdy júzege asyrady, — delingen Qorǵanys mınıstrligi taratqan habarlamada.

Aımaqtaǵy jaǵdaı ótken aptanyń aıaǵynda arab taıpalyq jasaqtary men drýzdardyń taýdaǵy ózin-ózi qorǵaý bólimsheleri arasynda qaqtyǵys bastalǵanda ýshyǵa tústi. Keıinirek Sırııa úkimetiniń kúshteri jaǵdaıdy retteý úshin qalaǵa kirdi. Sodan keıin Izraıl drýz halqyn qorǵaý úshin Sırııanyń Damasktegi áskerı jáne strategııalyq nysandaryna soqqy bere bastady.

Sırııanyń ýaqytsha prezıdenti Ahmed ash-Sharaa drýzdardy Sırııanyń ajyramas bóligi dep atap, Izraıl áreketin aıyptady.

— Biz soǵystan qorqatyndardyń qatarynan emespiz. Biz ómirimizdi qıyndyqtarmen betpe-bet kelip, halqymyzdy qorǵaýmen ótkizdik, biraq Sırııa halqynyń múddesin haos pen joıylýdan joǵary qoıdyq, — dep keltiredi ash-Sharaa sózin arab aqparat quraldary.

Birikken Ulttar Uıymynyń Qaýipsizdik Keńesi 17 shildede Izraıldiń Sırııaǵa jasaǵan shabýyldaryn talqylaý úshin shuǵyl jıyn ótkizedi.

Sırııadaǵy adam quqyqtaryn baqylaý uıymy belsendileriniń málimetinshe, aımaqtaǵy qaqtyǵystardan 350-den astam adam qaza tapqan. Resmı derekkózder buǵan deıin qurban bolǵandar sany áldeqaıda az bolǵanyn habarlaǵan bolatyn.

Drýzdar — músheleri Sırııa, Lıvan, Izraıl jáne Iordanııada turatyn etno-konfessııalyq top. Sırııanyń ózinde 700 myń drýz bar.

Buǵan deıin BUU Bas hatshysy Izraıldiń Sırııadaǵy áýe shabýylyn aıyptaǵanyn jazdyq.