Sırııa bıligi eldiń eltańbasyn ózgertti
ASTANA. KAZINFORM – Sırııanyń jańa memlekettik eltańbasy Damaskide resmı rásimde tanystyryldy, dep habarlaıdy Kazinform SANA agenttigine silteme jasap.
Jańa memlekettik rámizde endi qanatyn keńge jaıǵan qyran qus, basynyń ústinde úsh juldyz beınelengen. Sırııanyń ótpeli prezıdenti Ahmed ash-Sharanyń aıtýynsha, bul ózgeris el tarıhyndaǵy jańa kezeńdi, sondaı-aq Sırııa halqynyń kúsh-qýaty men tabandylyǵyn bildiredi.
– Bul qus – aspanda qalyqtaıtyn erjúrek jaýynger, qyraǵy ańshy, óz otbasynyń qorǵaýshysy. Onyń túsi eskirmeıtin eń taza metall tárizdi. Sırııa halqy ejelden osyndaı boldy, jańa dáýirde de solaı bolýy kerek, - dedi Ahmed ash-Sharaa.
Búginge deıin Sırııanyń eltańbasynda eki juldyzy bar, keýdesinde qalqany bar qyran beınelengen. Qus tabanynda «Sırııa Arab Respýblıkasy» degen jazýy bar lenta bolǵan.
Osyǵan deıin Tramp AQSh-tyń Sırııaǵa qarsy sanktsııalaryn alyp tastaǵanyn jazǵan edik.
