Sırııa bıligi Alepponyń jekelegen aýdandarynda atysty toqtatý týraly jarııalady
ASTANA.KAZINFORM — Úkimet kúshteri men kúrd jasaqtary arasynda birneshe kúnge sozylǵan keskilesken shaıqastan keıin Alepponyń birqatar aýdandarynda atysty toqtatý rejımi engizildi, dep habarlaıdy Kazinform tilshisi.
Sırııanyń Qorǵanys mınıstrligi juma kúni Alepponyń sheıh Maqsýd, Ashrafııa jáne Banı Zeıd aýdandarynda atysty toqtatatyny týraly málimdeme jasady.
Vedomstvonyń resmı málimdemesinde aıtylǵandaı, únsizdik rejımi jergilikti ýaqyt boıynsha saǵat 03:00–de kúshine engen jáne eldi mekenderde soǵys qımyldarynyń odan ári órshýine jol bermeýge baǵyttalǵan. Bul rette qarýly qurylymdarǵa belgilengen aýmaqtardan tańǵy saǵat 09:00–ge deıin shyǵýǵa buıryq berildi.
Vedomstvonyń málimdemesinde bul sharanyń óz úılerin tastap ketýge májbúr bolǵan beıbit turǵyndardyń elge oralýy jáne qaýipsizdik pen turaqtylyq jaǵdaıynda qalypty ómirdiń qalpyna kelýi úshin jaǵdaı jasaýǵa baǵyttalǵany aıtylǵan.
Aleppo gýbernatory Azzam ál-Garıb SANA memlekettik aqparat agenttigine atysty toqtatý jarııalanǵannan keıin Ashrafııa aımaǵyndaǵy qaýipsizdik sharalaryn jeke ózi teksergenin aıtty.
Apta basynan beri Aleppoda Sırııa armııasy men Sırııa demokratııalyq kúshteri (SDF) basqaratyn kúrd jasaqtary arasyndaǵy shaıqas jalǵasyp jatyr. Ashrafııa jáne Sheıh Maqsýd aýdandarynda beısenbige qaraǵan túnge deıin qarqyndy atys jalǵasty. Sırııa memlekettik telearnasy 16 myńǵa jýyq adamnyń úıin tastap ketýge májbúr bolǵanyn habarlady.
140 myńnan astam adam úıin tastap, keminde jeti beıbit turǵyn qaıtys boldy dep habarlandy.
AFP agenttiginiń habarlaýynsha, qaqtyǵystardan qaza tapqandar sany kem degende 21-ge jetti. Sırııa armııasy buǵan deıin áskerı operatsııa bastalǵanǵa deıin beıbit turǵyndardy evakýatsııalaý úshin gýmanıtarlyq dálizder qurylǵanyn jarııalaǵan bolatyn. Kýágerler qalanyń turǵyn aýdandarynda artıllerııalyq atys bolǵanyn habarlady.
SDF jetekshisi Mazlým Abdı úkimettiń kúrd aımaqtaryna jasaǵan shabýyldary taraptar arasyndaǵy kelisimge qol jetkizý múmkindigin tómendetetinin málimdedi. Onyń málimdemesi kúrd kúshteri men ákimshiligin ortalyq úkimet qurylymdaryna biriktirý týraly kelisim talqylanǵan Damaskke saparynan birneshe kún ótken soń jasaldy.
Abdıdiń aıtýynsha, aýyr tehnıka men tankilerdi paıdalaný jappaı beıbit turǵyndardyń qaza tabý qaýpin týdyrady jáne qaýipti demografııalyq ózgeristerge ákelýi múmkin.
Integratsııa týraly kelisimge ótken naýryz aıynda qol jetkizildi jáne 2025 jyldyń sońyna deıin kúrd qurylymdaryn jańa Sırııa memleketine birtindep engizýdi kózdedi. Alaıda, kelisimniń oryndalýy áli de kelispeýshilikterge ulasyp otyr.
Sáýir aıynda kúrd kúshterin Sheıh Maqsýd pen Ashrafııadan shyǵarý týraly buryn qol jetkizilgen kelisimderge qaramastan, bul aýmaqtar is júzinde olardyń baqylaýynda qaldy.
AQSh jaǵdaıǵa baılanysty qatty alańdaýshylyq bildirdi. AQSh prezıdentiniń Sırııa jónindegi arnaıy ókili Tom Barrak Vashıngton men onyń odaqtastary Aleppodaǵy shıelenisti azaıtýǵa jáne qaqtyǵysty toqtatýǵa daıyn ekenin málimdedi. Qazirgi ýaqytta Damask pen kúrd ókilderi arasynda qaladan kúshterdi shyǵarý týraly kelissózder júrip jatyr.
Aıta ketelik Aleppoda Sırııa úkimet kúshteri men kúrd kúshteri arasyndaǵy qaqtyǵystar kúsheıgeni týraly jazǵan edik.
