Sırııa bazarynda bolǵan jarylystan 7 adam qaza tapty

ASTANA. KAZINFORM — Sırııanyń soltústigindegi Aazaz qalasyndaǵy ortalyq bazarda bomba ornatylǵan kólik jarylyp, keminde 7 adam qaza taýyp, birneshe adam jaraqat aldy. Bul týraly VVS jazdy.

Áleýmettik jelilerde jerde jatqan máıitter, búlingen ǵımarattar men órtenip jatqan kólikterdiń vıdeosy tarady. 

Túrkııa shekarasynan jeti shaqyrym jerde ornalasqan shaǵyn qalashyqtaǵy bul jarylystyń artynda kim turǵany ázirge belgisiz. Jarylys kezinde Ramazan aıynyń aıaqtalýyn bildiretin mereke qarsańynda bazar adamǵa toly boldy. 

«Aq dýlyǵalar» eriktiler uıymynyń qutqarýshylary qaza tapqandar arasynda 2 bala bar ekenin habarlady.

Aazaz qalasy Sırııa prezıdenti Bashar Asadqa qarsy soǵysyp jatqan túrikshil jasaqtardyń baqylaýynda.

Túrik áskerleri men olar qoldaıtyn kúshter Sırııanyń túrik shekarasyna jaqyn ornalasqan aýdandaryn baqylaıdy.

Sırııanyń soltústik-batysyndaǵy shekaralyq aımaqtarǵa, sonyń ishinde halyq tyǵyz ornalasqan Aazazǵa mundaı jarylystar jıi bolyp turady.

2016 jyldyń qarashasynda kóterilisshilerdiń Aazazdaǵy shtab-páteri mańynda bomba ornatylǵan kólik shabýylynan 25 adam kóz jumdy. Qazan aıynda kóterilisshiler baqylaý-ótkizý pýnktine jasalǵan osyndaı shabýylda da 17 adam opat bolǵan edi.

2017 jyly Aazazda qalalyq sot ǵımaratynyń janynda bomba ornatylǵan kólik jarylyp, taǵy 40-tan astam adam qaza tapqan bolatyn.  

Bul shabýyldy 2013 jyly qalany basyp alyp, biraz ýaqyt ustap turǵan «Islam memleketi» (Qazaqstanda tyıym salynǵan) toby moınyna aldy.