Sırııa basshysy qantógiske kinálilerdi jazalaýǵa ýáde berdi

ASTANA. KAZINFORM – Ahmed ash-Sharanyń málimdemesi Sırııanyń qaýipsizdik kúshteri alavıt azshylyǵyna jatatyn júzdegen beıbit turǵyndy óltirdi dep aıyptalǵan soń jasaldy, dep habarlaıdy VVS. 

Ulybrıtanııada ornalasqan Sırııadaǵy adam quqyqtaryn baqylaý ortalyǵy (SOHR) teńiz jaǵalaýyndaǵy qalalarda juma jáne senbi kúnderi alavıtterge qarsy jasalǵan 30-ǵa jýyq shabýylda 973 beıbit turǵyn qaza tapqanyn málimdedi. 

Baqylaýshylar qurbandardyń jalpy sanyn, sonyń ishinde qarýly top múshelerin qosa eseptegende buryn 1300 adam dep baǵalady, onyń ishinde olardyń málimetinshe qaýipsizdik kúshteriniń 231 qyzmetkeri jáne bılikten qýylǵan prezıdent Bashar Asadty qoldaǵan 250 sodyr qaza tapty. 

Sırııa memlekettik telearnasynda sóılegen sózinde ash-Sharaa sondaı-aq Asadqa adal kúshterdi taýyp, olardy zalalsyzdandyrýǵa ýáde berdi.

— Búgin biz osy qıyn sátti bastan ótkerip jatqanda, aldymyzda jańa qaýip tur — bul burynǵy rejımnen qalǵandar men olardyń sheteldik jaqtastarynyń jańa alaýyzdyq týdyryp, elimizdi azamattyq soǵysqa tartý áreketteri. Olardyń maqsaty — bizdi jikke bólip, birligimiz ben turaqtylyǵymyzdy buzý. Biz beıbit turǵyndar arasyndaǵy qantógiske qatysqan nemese halqymyzǵa zııan keltirgenderdiń barlyǵyn qatań túrde jáne eshbir meıirimsiz jaýapqa tartatynymyzdy rastaımyz. Memleket ókilettigin asyra paıdalanǵan nemese bılikti jeke maqsatta paıdalanǵan adamdar, — dedi Sırııa basshysy. 

Buǵan deıin ash-Sharaa «beıbit turǵyndarǵa qarsy zań buzýshylyqtardy tekseretin jáne olarǵa jaýaptylardy tabatyn» «táýelsiz komıtet» quratynyn habarlady.

Eske sala ketsek, Sırııanyń ýaqytsha prezıdenti Ahmad ash-Sharaa burynǵy úkimetke qatysy bar qarýly toptardy qarý-jaraqtaryn tapsyrýǵa, al jańa úkimetke adaldardy beıbit turǵyndarǵa shabýyl jáne tutqyndarǵa qııanat jasamaýǵa shaqyrdy.