Sırııa azamattyq soǵystan shekken zııanyn eseptedi
ASTANA. 20 aqpan. QazAqparat - Sırııa bıligi azamattyq soǵystyń kesirinen bir trıllıon sırııalyq fýnt, al AQSh dollaryna shaqqanda 14 mlrd dollar mólsherinde zııan shekkenin eseptep shyǵardy.
Bul jaıynda memlekettik SANA aqparat agenttigi jergilikti ózin-ózi basqarý mınıstri Omar Galıavındjıge silteme jasaı otyryp, habar taratty. Onyń aıtýynsha, 2013 jyldyń qańtar aıynyń 10-yna deıingi eldegi jaǵdaıdy elep-ekshep, bılik pen oppozıtsııa arasyndaǵy qarýly qaqtyǵystan kelgen shyǵyndy shotqa salyp, esebin shyǵarǵan úkimet komıssııasy búlingen, qıraǵan aýdandardy qalpyna keltirýdiń qajettiligine toqtalǵan.
Sırııa bıligi eldegi ekonomıkanyń quldyraýynyń sebebin sheteldikterden kórip otyr. Buǵan qosa, úkimet beıbit turǵyndardyń qazasyna ekonomıkalyq sanktsııa salǵan batysty aıyptap otyr. Al asa qajetti taýarlardyń tapshylyǵyna kúre joldardyń birtalaıyn jaýyp tastaǵan sodyrlardy kinálaýda.
muslim.kz saıtynyń jazýynsha, Sırııa bıliginiń bul aıyptaýyn teriske shyǵarǵysy kelgendeı EO elderiniń SІM basshylary aqpannyń 18-i kúni janjal oty áli sónbegen osy elge qatysty sanktsııany taǵy úsh aıǵa sozý týraly kelisimge keldi. EO málimdemesinde bul joly da beıbit turǵyndardyń kóz jasyna qalyp, ınfraqurylymnyń toz-tozyn shyǵaryp, eldiń mádenı murasyna qaýip tóndirgen Sırııa bıliginen áskerı is-qımyldy toqtatýdy talap etti. EO taraptardy el prezıdenti Bashar Asadtyń óz erkimen bılikten ketýine bastaıtyn dıalogqa shaqyrdy.
Bashar Asadtyń rejımin jaqtaıtyndar men qarsylastardyń arasyndaǵy qarýly qaqtyǵys 2011 jyldyń naýryz aıynan beri tolastaǵan emes. 2012 jyldyń jaz mezgilinde halyqaralyq qaýymdastyq Sırııada azamattyq soǵystyń júrip jatqanyn moıyndaǵan bolatyn.
2013 jyldyń qańtar aıyndaǵy BUU-nyń málimetine qaraǵanda, eldegi jan tózgisiz jaǵdaıdan bas saýǵalap, shetel asqan sırııalyq bosqyndardyń sany 2,5 mln adamǵa jetken. «The Huffington Post» sonyń ishinde 800 myńnan asa sırııalyqtyń kórshiles elderge qashqanyn jazypty. Sońǵy derekke zer salsaq, 70 myńdaı adam qandy qaqtyǵystan qaza bolǵan. BUU buǵan eki jaqty da aıyptap, ıaǵnı bul búlikke bıliktiń de, oppozıtsııanyń da qatysy baryn málimdedi.
