Sırııa astanasynda jarylys bolyp, birneshe adam zardap shekti
ASTANA. KAZINFORM — Damask qalasynyń ortalyǵyndaǵy Ádilet saraıynyń mańynda jarylys boldy. Saldarynan birneshe adam zardap shekken. Alaıda olardyń naqty sany ázirge belgisiz. Bul týraly jergilikti BAQ pen oqıǵa kýágerleri habarlady, dep jazady Sınhýa.
Sırııanyń SANA memlekettik aqparat agenttiginiń málimetinshe, jarylys Hıdjaz aýdanyndaǵy dámhanalardyń birinde bolǵan. Oqıǵa saldarynan birneshe adam jaraqat alǵan.
Qazir oqıǵanyń mán-jaıy anyqtalyp jatyr. Keıbir kýágerlerdiń aıtýynsha, jarylysqa akkýmýlıator batareıasynyń qyzyp ketýi sebep bolýy múmkin.
Polıtsııa oqıǵa ornyn qorshaýǵa alyp, jaqyn mańdaǵy aýmaqty baqylaýǵa aldy. Bul mańǵa birneshe jedel járdem kóligi keldi.
Buǵan deıin Damask qalasynda Sırııa Qorǵanys mınıstrligi ǵımaratynyń mańynda jarylys boldy. Oqıǵa saldarynan bir áskerı qyzmetker qaza taýyp, taǵy 23 adam jaralanǵan bolatyn.
