Sırııa arnaıy qyzmeti Ahmad ash-Sharaaǵa baǵyttalǵan eki qastandyqtyń aldyn aldy
ASTANA. KAZINFORM – Sırııa arnaıy qyzmeti eldiń ýaqytsha prezıdenti Ahmad ash-Sharaaǵa qastandyq jasaýǵa daıyndalǵan «Islam memleketi» (IM, Qazaqstanda tyıym salynǵan uıym – red.) sodyrlarynyń eki josparyn áshkereledi, dep habarlaıdy Reuters.
Sırııalyq qaýipsizdik organdarynyń joǵary laýazymdy ókilderiniń málimetinshe, prezıdentke qarsy qastandyq áreketteri sońǵy aılarda anyqtalǵan. Solardyń biri ash-Sharaa qatysýy tıis bolǵan jarııa is-shara kezinde júzege asyrylmaq bolǵan.
Sırııanyń aqparat mınıstrligi IM uıymy el men aımaq qaýipsizdigine áli de eleýli qaýip tóndirip otyrǵanyn habarlady. Vedomstvonyń dereginshe, sońǵy on aı ishinde dinı nysandarǵa baǵyttalǵan birneshe shabýyldyń aldyn alý múmkin bolǵan.
Qastandyq áreketteri Ahmad ash-Sharaanyń AQSh prezıdenti Donald Tramppen aldaǵy kezdesýi qarsańynda daıyndalǵan. Bul – sırııalyq basshynyń Aq úıge jasaıtyn alǵashqy resmı sapary jáne eki el basshylary arasyndaǵy alǵashqy kelissóz bolmaq.
2024 jylǵy jeltoqsanda Bashar Asad bılikten taıdyrylǵannan keıin, buryn «Haıat Tahrır ash-Sham» (HTSh, Qazaqstanda tyıym salynǵan uıym – red.) qozǵalysyn basqarǵan Ahmad ash-Sharaa el ishinde qalypty ári kelisimshil saıasatker beınesin qalyptastyrýǵa jáne soǵystan qıraǵan elin qalpyna keltirýge halyqaralyq qoldaý alýǵa tyrysyp keledi.
Damaskiniń IM-ge qarsy AQSh jetekshilik etetin halyqaralyq koalıtsııaǵa qosylý týraly sheshimi Sırııanyń syrtqy saıasatynda betburys jasady. Bul qadam eldiń burynǵy Reseı jáne Iranmen odaqtas baǵytyn ózgertip, Batys pen arab elderimen yntymaqtastyqqa jol ashyp otyr.
Kezdesý aldynda Sırııa ishki ister mınıstrligi IM-ge qarsy aýqymdy operatsııa júrgizip, 70-ten astam kúdiktini ustaǵan.
Bıyl sodyrlar elde qaıta belsendilik tanytyp, bılik júrgizip jatqan turaqtandyrý sharalaryna kedergi keltirýge tyrysýda. Maýsym aıynda Damaskidegi shirkeýde bolǵan jarylystan 25 adam qaza tapqan edi.
Resmı ókilderdiń málimetinshe, Sırııa úkimeti AQSh áskerı qurylymdarymen IM-ge qarsy kúreste birneshe aıdan beri tyǵyz áreket etýde. Halyqaralyq koalıtsııaǵa resmı qosylý bul yntymaqtastyqty kúsheıtip, Sırııaǵa qarsy sanktsııalardyń bir bóligin jumsartýǵa múmkindik beredi.
Aıta keteıik, AQSh Sırııa prezıdentin terrorıster tiziminen shyǵardy.