Sırııa 5 jylǵa ýaqytsha konstıtýtsııaǵa qol qoıdy
ASTANA. KAZINFORM — Sırııa basshysy Ahmed ash-Sharaa ýaqytsha konstıtýtsııaǵa qol qoıdy. Ol saılaýǵa daıyndyq bes jylǵa sozylýy múmkin ekenin aıtty, dep jazady Euronews.
Ahmed ash-Sharaa bes jyldyq ótpeli kezeńde barlyq sırııalyqtyń quqyǵyn qorǵaýǵa baǵyttalǵan ýaqytsha konstıtýtsııaǵa qol qoıdy.
Konstıtýtsııalyq sarapshy ári ýaqytsha konstıtýtsııanyń jobasyn ázirleý mindeti júktelgen ash-Sharaa komıtetiniń jeti múshesiniń biri Abdýlhamıd ál-Aýak baspasóz máslıhatynda qujatta burynǵy konstıtýtsııanyń keıbir erejesi, sonyń ishinde memleket basshysy musylman bolýy kerek jáne ıslam zańdarynyń basymdylyǵy týraly ereje saqtalǵanyn aıtty.
Ál-Aýak ýaqytsha konstıtýtsııanyń sóz jáne BAQ bostandyǵyn bekitetin erejelerdi qamtıtynyn jáne bıliktiń zań shyǵarýshy, atqarýshy jáne sot tarmaqtary arasynda «absolıýtti jáne qatań alshaqtyqty» ornata otyryp, «áleýmettik qaýipsizdik pen bostandyq arasynda teńdik» bolatynyn málimdedi.
Ýaqytsha konstıtýtsııanyń mátini turaqty konstıtýtsııa qabyldanyp, saılaý ótkizilgenge deıin ýaqytsha parlament qyzmetin atqaratyn Halyq komıtetin qurýdy qarastyrady. Onyń músheleriniń úshten ekisin ýaqytsha prezıdent saılaǵan komıtet, al úshten birin Ahmed ash-Sharaanyń ózi taǵaıyndaıdy.
Beısenbi kúni keshke jarııalanǵan qujatta Sırııa memleketiniń «quqyqtar men bostandyqtardy saqtaı otyryp, zorlyq-zombylyq ekstremızmniń barlyq túrlerimen kúresetindigi» jáne «azamattar násiline, dinine, jynysyna nemese tegine baılanysty kemsitýsiz quqyqtar men mindetter boıynsha zań aldynda teń» ekendigi aıtylǵan.
Sondaı-aq konstıtýtsııada armııanyń «kásibı ulttyq mekeme» ekendigi, onyń baqylaýynan tys qarý-jaraqqa tyıym salynǵany jáne «burynǵy Asad rejımin dáripteý» endi qylmys bolyp sanalatyny da aıtylǵan.
Turaqty konstıtýtsııa ázirleý úshin jańa komıtet qurylady, biraq onyń qazirgi nusqasynan góri Sırııanyń saıası, dinı jáne etnıkalyq toptaryn qamtıtyny belgisiz.
Buǵan deıin Sırııada eldiń ulttyq qaýipsizdigi men memleket aldynda turǵan mindetterge qatysty sheshimder qabyldaıtyn Ulttyq qaýipsizdik keńesi qurylatyny belgili bolǵan edi.
Sırııanyń jańa bıligi kúrdter basqaratyn, AQSh qoldaıtyn Sırııa demokratııalyq kúshterimen áskerı jáne azamattyq ınstıtýttardy ortalyq úkimetke biriktirý týraly kelisimge keldi.