Sırııa 14 jylda alǵash ret munaı partııasyn eksporttady

ASTANA. KAZINFORM — Sırııa sońǵy 14 jyldaǵy alǵashqy resmı munaı tasymaldaýyn júzege asyrdy. 600 myń barrel eksporttyq partııasy Jerorta teńizindegi Tartýs portynan jóneltildi, dep habarlaıdy Report.az Sırııanyń SANA memlekettik agenttigine silteme jasap. 

Sırııa energetıka mınıstrliginiń ókili Rııad ál-Djýbasıdiń aıtýynsha, satyp alýshy B Serve Energy halyqaralyq saýda kompanııasy bolǵan. Munaıdyń birinshi partııasyn tasymaldaý Nissos Christiana tankerinde júzege asyrylady. Sırııalyq sheneýnik atap ótkendeı, jetkizilim kólik jelileriniń, munaı saqtaý qoımalarynyń jáne port ınfraqurylymynyń jumys isteý dárejesin anyqtaýǵa múmkindik beredi.

Sırııa munaı tasymaldaý kompanııasynyń bas dırektory Maan Pasha qazirgi eksport kólemi eldiń ishki qajettilikterinen asyp túsetinin atap ótti. Onyń aıtýynsha, tankerge Sırııanyń birneshe ken oryndarynda óndirilgen munaı, sondaı-aq Banııas pen Homstaǵy zaýyttardaǵy shıkizatty óńdeýden artyp qalǵan ónimder tıelgen. Seriktestik basshysy naqty ken oryndaryn atamady. Sırııanyń munaı resýrstarynyń basym bóligi eldiń soltústik-shyǵysynda kúrdterdiń baqylaýyndaǵy aımaqtarda ornalasqan.

2011 jyly azamattyq soǵys bastalǵanǵa deıin Sırııa kúnine shamamen 380 000 barrel munaı eksporttaǵan. Biraq kóp jyldarǵa sozylǵan qaqtyǵystar eldiń energetıkalyq ınfraqurylymyn qıratyp, halyqaralyq sanktsııalar munaı men gaz saýdasyn qıyndatyp jiberdi.

Eske sala keteıik, Sırııa qaýipsizdik maqsatynda úsh provıntsııadaǵy saılaýdy keıinge qaldyrdy.