Syrym Sháriphanov ruqsatsyz salynǵan jataqhanalarǵa qatysty pikir bildirdi
Tótenshe jaǵdaılar mınıstri Syrym Sháriphanov el aýmaǵyndaǵy hostelder men jataqhanalardaǵy qaýipsizdik jaǵdaıyn qadaǵalaýǵa qatysty túsinik berdi, dep habarlaıdy Kazinform.
«Jataqhanalardyń ózindik klassıfıkatsııasy bar. Bul rette osy nysandar úsh tıpke bólinedi. Joǵary, ortasha, tómen táýekeldegi nysandar bolyp jikteledi. Biz turǵyndar sany 2 myńnan astam joǵary táýekeldegi jataqhanany tekseremiz, tıisti jospar boıynsha bul jumystar atqarylyp jatyr. Shaǵyn jáne orta bızneske qysym bolmaýy úshin bizde basqa kategorııalar qamtylmaǵan. Sol sebepti bul máseleni basqa jolmen sheship jatyrmyz, ıaǵnı barlyq jataqhanalar (shaǵyn nysandar) men hostel boıynsha «Jataqhana» aktsııasyn uıymdastyrdyq. Bul turǵyda bizdiń mamandar men ishki ister organdarynyń ókilderi birlese atalǵan nysandardy aralap, órt qaýipsizdigin túsindirip jatyr», - dedi S. Sháriphanov Senattaǵy parlamenttik tyńdaýdan keıin tilshiler suraǵyna jaýap bere otyryp.
Sonymen qatar tilshiler jeke turǵyn úılerdiń aýmaǵynda ruqsatsyz salynǵan jataqhanalardy tekserý múmkindigine qatysty suraq qoıdy.
«Osyndaı nysandarda órt qaýipsizdigi jaǵdaıyn qadaǵalaý turǵysynda memlekettik organda belgili bir qıyndyqtar bar. Órt qaýipsizdiginiń qyzmetkerleri jekemenshik nysandarǵa tikeleı baryp, teksere almaıdy. Tekserýler tek táýekeli joǵary nysandarda ǵana iske asyrylady jáne tıisti bekitilgen erejege sáıkes atqarylady. Atap aıtqanda, turǵyn úılerdi, kottedjderdi hostelge aınaldyrý arqyly keıbir turǵyndar osydan tabys alyp otyr. Ókinishke qaraı, mundaı nysandar kún saıyn kóbeıip keledi. Qaýipsizdik erejeleri saqtalmaǵandyqtan, olar turǵyndardyń densaýlyǵy men ómirine qaýip tóndiredi. Sondyqtan Ónerkásip jáne qurylys mınıstrligimen birlese tıisti jumystardy bastap kettik. Sebebi adamdar eshbir ruqsat qujattarynsyz óz erkimen nysandardy basqa maqsatta paıdalanyp jatyr. Al shaǵym bolmasa, osyndaı ǵımarattardy tekserý qıynǵa túsedi. «Jataqhana» aktsııasy aıasynda osyndaı hostelderdi qamtýǵa tyrysyp jatyrmyz», - dedi vedomstvo basshysy.
Aıta keteıik, qazir el óńirlerinde «Jataqhana» aktsııasy ótip jatyr. Bul rette órt qaýipsizdigi erejelerin saqtaý máselesine erekshe nazar aýdarylǵan. TJ departamenti qyzmetkerleri, polıtsııa, jergilikti atqarýshy organdar men eriktiler arasynan mobıldi toptar qurdy. Profılaktıkalyq is-sharalar barysynda elektr symdarynyń, gaz, jylytý jáne elektrmen jylytý peshteriniń jaı-kúıine, sondaı-aq evakýatsııalaý joldaryna erekshe nazar aýdarylady.
Budan buryn habarlanǵandaı, bıiktigi 28 metrden asatyn ǵımarattar men adamdar jappaı shoǵyrlanatyn nysandardy paıdalanýǵa qabyldaý kezinde Tótenshe jaǵdaılar mınıstrliginiń qatysýyn qaıtarý boıynsha norma ázirilendi.
