«Syrym» ótkizý pýnkti kelesi jyldyń sońyna deıin jabyq bolady

ASTANA. KAZINFORM — Qazaqstan men Reseı Federatsııasy shekarasynda ornalasqan «Syrym» avtomobıl ótkizý pýnktin qaıta jańǵyrtý jáne jańartý jobasy bastaldy.  

— Qurylys jumystarynyń bastalýyna baılanysty 2025 jylǵy 4 tamyzdan bastap «Syrym» ótkizý pýnkti arqyly jeńil jáne qoǵamdyq kólikter úshin ótý ýaqytsha toqtatylady. Shekteýler 2026 jylǵy 31 jeltoqsanǵa deıin josparlanyp otyr, — delingen QazAvtoJol habarlamasynda.

Al júk kólikteri úshin shekaradan ótý elektrondyq kezek júıesi arqyly júzege asyrylady, kúndelikti ótkizý qabilettiligi: 200-250 avtokólik.

Buǵan deıin «QazAvtoJol» UK» AQ-nyń Batys Qazaqstan oblystyq fılıaly shekteýlerdi engizý merziminiń keıinge shegerilgeni týraly habarlaǵan. Qazirgi tańda naqty merzim bekitilip, jumys josparlanǵan kestege saı júrgizilmek.

Memlekettik shekarany ótýge arnalǵan balamaly ótkizý pýnktteri:

1) «Shaǵan» (QR) / «Teploe» (RF) — ekijaqty, Qazaqstan jáne Reseı azamattaryna arnalǵan. KZ07-01 Oral — RF shekarasy (Shaǵan ótkizý pýnkti) avtomobıl jolynyń 33 shaqyrymynda ornalasqan;

2) «Aqsaı» (QR) / «Ilek» (RF) — halyqaralyq ótkizý pýnkti. KZ07-04 Podstepnoe — Fedorovka — RF shekarasy (Aqsaı ótkizý pýnkti) avtomobıl jolynyń 144 shaqyrymynda ornalasqan;

3) «Tasqala» (QR) / «Ozınkı» (RF) — halyqaralyq ótkizý pýnkti. KZ07-06 Oral — Tasqala — RF shekarasy (Tasqala ótkizý pýnkti) avtomobıl jolynyń 104 shaqyrymynda ornalasqan.

Aıta ketelik Qarqaraly men Balqashqa aparatyn joldar jańaryp jatyr.