«Syrym» beketinde qujatsyz jumyrtqa tıelgen júk kóligi keri qaıtaryldy
ASTANA. KAZINFORM — Batys Qazaqstan oblysyndaǵy «Syrym» veterınarııalyq baqylaý beketinde Qazaqstan aýmaǵyna 20 tonna taǵamdyq taýyq jumyrtqasyn zańsyz kirgizý áreketiniń joly kesildi.
Samara (Reseı Federatsııasy) — Astana baǵyty boıynsha kele jatqan júk avtokóligin memlekettik veterınarııalyq-sanıtarııalyq ınspektorlar Batys Qazaqstan oblysy boıynsha UQK Shekara qyzmeti departamenti qyzmetkerlerimen birlesip tekserý barysynda taǵamdyq taýyq jumyrtqalarynyń zańnamada kózdelgen veterınarııalyq ilespe qujattarsyz tasymaldanǵany anyqtaldy.
Júk tıelgen avtokólik keri qaıtaryldy. Júrgizýshige qatysty ákimshilik hattama toltyrylyp, aıyppul salyndy.
Tasymaldaýshylarǵa Qazaqstan Respýblıkasynyń jáne Eýrazııalyq ekonomıkalyq odaqtyń veterınarııalyq zańnamasy talaptary, onyń ishinde Eýrazııalyq ekonomıkalyq odaq Komıssııasynyń 2010 jylǵy 18 maýsymdaǵy № 317 «Eýrazııalyq ekonomıkalyq odaqta veterınarııalyq-sanıtarııalyq sharalardy qoldaný týraly» sheshiminiń qaǵıdattary túsindirildi.
Aıta keteıik, Aýyl sharýashylyǵy mınıstriniń buıryǵyna sáıkes, 2026 jylǵy 21 sáýirden bastap alty aı merzimge úshinshi elderden jáne EAEO-ǵa múshe memleketterden Qazaqstan aýmaǵyna kóliktiń barlyq túrimen taýyq jumyrtqalaryn ákelýge tyıym salynǵan.
Atalǵan sharalar atalǵan ónim tasymalyn retteýge, sondaı-aq eldegi veterınarııalyq-sanıtarııalyq jáne epızootııalyq qolaılylyqty qamtamasyz etýge baǵyttalǵan.
Jalpy, jyl basynan beri «Syrym» veterınarııalyq baqylaý beketinde zańnama talaptarynyń 216 ret buzylǵany anyqtaldy. 216 júk avtokóligi keri qaıtaryldy. 90 adamǵa qatysty ákimshilik hattama toltyrylyp, aıyppul salyndy.
Aýyl sharýashylyǵy mınıstrligi tasymaldaýshylar men syrtqy ekonomıkalyq qyzmetke qatysýshylardy Qazaqstan Respýblıkasynyń jáne Eýrazııalyq ekonomıkalyq odaqtyń veterınarııalyq zańnamasy talaptaryn qatań saqtaýǵa shaqyrady.
Memlekettik shekara arqyly baqylaýǵa jatatyn ónimderdi ótkizý kezinde veterınarııalyq ilespe qujattardyń bolýyna jáne belgilengen shekteýlerdiń saqtalýyna erekshe nazar aýdarý qajet.
Veterınarııalyq-sanıtarııalyq talaptardy saqtaý epızootııalyq qaýipsizdikti qamtamasyz etýdiń jáne Qazaqstan Respýblıkasynyń azyq-túlik naryǵyn qorǵaýdyń mańyzdy quramdas bóligi.
Aıta ketelik jolaýshylar qandaı taýarlardy aqysyz ákele alatyny týraly jazǵan edik.
