Astanada qysqy oıyn-saýyq: qaıda baryp kóńil kóterýge bolady
ASTANA. KAZINFORM — Astananyń 6 aýdanyndaǵy 34-ten asa lokatsııada muzdan jasalǵan syrǵanaqtar, muz aıdyndary, túrli-tústi fotoaımaqtar men erekshe shaǵyn sáýlettik formalar ornatylyp jatyr, dep habarlaıdy elorda ákimdiginiń resmı saıty.
Elordada balalar men eresekterdiń qysqy demalysyn qyzyqty ári densaýlyqqa paıdaly etý baǵytynda aýqymdy jumys júrgizilip jatyr. Jalpy qala boıynsha 57 syrǵanaq pen muz aıdyny paıdalanýǵa berildi.
Saryarqa aýdanynda 12 syrǵanaq pen 4 muz aıdyny jabdyqtalǵan. Qalalyq alańda úlken syrǵanaq pen muz aıdyny ornatylyp, merekelik fotosýretterge arnalǵan taqyryptyq fotoaımaqtar men shynaıy shyrsha qoıylǵan.
Bógenbaı batyr dańǵyly, 43 mekenjaıyndaǵy gúlzarda ortasynda úlken shyrshasy bar muz aıdyny ashyldy. «Kóktal» saıabaǵynda ártúrli jas sanatyna arnalǵan eki syrǵanaq pen jappaı syrǵanaýǵa arnalǵan úlken muz aıdyny bar. Al A.Gertsen men Oqjetpes kósheleriniń qıylysynda syrǵanaq ornatylǵan.
Baıqońyr aýdanynda negizgi oıyn-saýyq nysandary «Jastar» saraıynyń aýmaǵynda (Respýblıka dańǵyly, 34) ornalasqan. Munda muz aıdyny, syrǵanaq pen jańa jyldyq shyrsha qoıylǵan. J.Táshenev kóshesindegi Atatúrik atyndaǵy saıabaqta da muz aıdyny men syrǵanaq bar.
Abaı dańǵylyndaǵy «Qalamgerler alleıasynda» syrǵanaq, shyrshalar, jańa jyldyq ınstallıatsııalar men shaǵyn sáýlettik formalar ornatylǵan. Sondaı-aq Óndiris turǵyn alabynda (Aqbıdaı men Kemeńgeruly kósheleriniń qıylysy), Ózen kóshesinde (Ózen kóshesi men Jezkıik tuıyǵy), Kirpishti turǵyn alabynda (Chehoev pen Jolymbet kósheleriniń qıylysy) muz aıdyndary men syrǵanaqtar ashyldy.
Esil aýdanynda qysqy serýenniń basty ortalyǵy dástúrli túrde EKSPO aýmaǵy bolyp otyr. Munda muz aıdyny, syrǵanaq jáne merekelik shyrsha qoıylǵan. Sonymen qatar Prıgorodnyı turǵyn alabynda jáne «Baǵystan» turǵyn kesheninde de syrǵanaqtar bar.
Jańa jyldyq shyrshalar Túrkistan kóshesi jaǵyndaǵy Botanıkalyq baqta, Qazaq radıosy kóshesiniń boıynda, sondaı-aq Dostyq kóshesi men Nurjol býlvarynyń qıylysyndaǵy jańa skverde ornatylǵan.
«Jetisý» saıabaǵynda syrǵanaq pen shyrsha bar, al «Prıgorodnyı» turǵyn alabynda syrǵanaq turǵyndardyń ıgiligine berilgen.
Almaty aýdanynda qysqy demalysqa arnalǵan birneshe oryn uıymdastyrylǵan. «Sana» sport kesheniniń artyndaǵy Aqbulaq ózeniniń jaǵalaýynda muz aıdyny men syrǵanaq jumys isteıdi. «Jeruıyq» saıabaǵynda da muz aıdyny men syrǵanaq bar. Sonymen qatar Temirjolshylar turǵyn alabynda jáne Qoshqarbaev kóshesi, 80/1 mekenjaıynda syrǵanaqtar ornatylǵan.
Saraıshyq aýdanynda syrǵanaqtar, muz aıdyndary men ártúrli bıiktiktegi shyrshalar «Qazaq Eli» alańynda, Prezıdent saıabaǵynda, Jumysshy mamandyqtary alleıasynda jáne «Nurly Jol» temirjol vokzaly aýmaǵynda ornalastyrylǵan. Promyshlennyı, Otaý, Internatsıonaldy, Mıchýrıno jáne Kúıgenjar turǵyn alaptarynda da muz syrǵanaqtary men shaǵyn sáýlettik formalar ornatylǵan.
Nura aýdanynda taqyryptyq shaǵyn sáýlettik formalar qoıylyp, fotoaımaqtar bezendirilgen.
Sondaı-aq tórt muz aıdyny jumys isteıdi: uzyndyǵy 213 metr bolatyn sheńberli muz aıdyny Ortalyq saıabaqta, «Astana-Arena» stadıony aýmaǵynda, «Ǵashyqtar» saıabaǵynda jáne Úrker turǵyn alabynda.
Budan bólek, Ortalyq saıabaqta, «Býharest» saıabaǵynda, «Astana-Arena» aýmaǵynda jáne Úrker turǵyn alabynda tórt muz syrǵanaǵy bar.
Budan buryn Astana ortalyǵynda jylyna neshe marafon ótkizýge ruqsat beriletini aıtyldy.