Sırek metaldardy óńdeýde alpaýyt eldermen kelisim jasaldy
ASTANA. KAZINFORM – Sırek metaldar salasyndaǵy ınvestıtsııalar kólemi 40 paıyzǵa artady. Bul týraly QR Ónerkásip jáne qurylys mınıstri Qanat Sharlapaev málim etti.
«Sırek metaldar salasyndaǵy ınvestıtsııalar men óndiris kólemin 40 paıyzǵa ulǵaıtýdy eskergen 2024 - 2028 jyldarǵa arnalǵan keshendi jospar bekitildi. Memlekettiń syrtqy ekonomıkalyq baılanysy sheshýshi ról atqarady. Mınıstrlik Eýropa Odaǵymen, AQSh-pen jáne Ulybrıtanııamen sırek metaldar boıynsha yntymaqtastyqty nyǵaıtty», - dedi Q. Sharlapaev Parlament Májilisindegi Úkimet saǵatynda.
Onyń aıtýynsha, naqty nátıjeler retinde lıtıı ken oryndaryn birlesip ıgerý, sondaı-aq sırek metaldardy qaıta óńdeý týraly nemis, aǵylshyn jáne amerıkalyq kompanııalarmen jasalǵan kelisimder bar.
«Salany damytý tujyrymdamasynda mıneraldy bazany ulǵaıtýǵa, zamanaýı tehnologııalardy tartýǵa, qoldanystaǵy óndiristi keńeıtý maqsaty qoıyldy. Eń bastysy - jahandyq qun tizbeginiń orta býynyndaǵy Qazaqstannyń rólin nyǵaıtý», - dedi mınıstr.
