Sırek kezdesetin júrek aýrýyna shaldyqqan jigitke kúrdeli operatsııa jasaldy
ALMATY. KAZINFORM — Almatyda Kardıologııa jáne ishki aýrýlar ǵylymı zertteý ınstıtýtynyń kardıohırýrgtary 21 jasynda ınfarkt alǵan jas jigittiń júregine operatsııa jasady.
Dárigerlerdiń aıtýynsha mıokard ınfarkti jastar arasynda óte sırek kezdesedi. Álem boıynsha mundaı dıagnoz 10-15 jylda bir adamǵa ǵana qoıylady.
Mańǵystaýlyq Álimjan Atantaıdyń ózi, buǵan deıin densaýlyǵyna shaǵymdanyp kórmegenin jáne eshteńe mazalamaǵanyn jetkizdi.
«Osy kúnge deıin men de týa bitken júrek patologııasy bar ekenin bilmedim. Maýsym aıynda jaǵdaıym kúrt nasharlap, qan qysymym eki júzge deıin kóterilip, júrek soǵysym jılep ketti. Dári iship kórdim. Basylmaǵan soń dárigerlerge qaraldym. Maǵan júrektiń qarynsha ústi tahıkardııasy, mıokard ınfarkti dıagnozyn qoıdy. Eki kún jansaqtaý bóliminde jattym. Keıin dárigerler operatsııany portalmen Almatydaǵy «Kardıologııa jáne ishki aýrýlar» ǴZI jasaýdy usyndy. Men qabyl aldym », - deıdi ol.
Kardıohırýrgtar qarynsha ústi tahıkardııasynyń qaıtalap ustap qalý qaýpi joǵary bolǵandyqtan, dereý ota jasaý týraly sheshim qabyldady.
«Biz Reseı professory Sergeı Nıkolaevıchpen 12 jyldan astam ýaqyt jumys istep kelemiz, ol bizdiń dárigerlermen birge júrek yrǵaǵynyń buzylýy bar eń aýyr naýqastarǵa operatsııa jasaıdy. Bizde bar jabdyq álemdik standarttarǵa saı keledi jáne eń kúrdeli operatsııalardy jasaýǵa, dıagnostıkalaý dáldiginiń arqasynda olardyń tıimdiligin arttyrýǵa, bolashaqta qaıtalanatyn operatsııa jasaý qajettiligin azaıtýǵa, kenetten bolatyn ólim men mıokard ınfarkti, júrek qyzmetiniń jetkiliksizdiginiń damýy, ınsýlt jáne t.b. asqynýlardyń sanyn azaıtýǵa múmkindik beredi», - deıdi Basqarma tóraǵasy Marat Pashımov.
Operatsııa shamamen 2 saǵatqa sozyldy jáne sátti aıaqtaldy.
«Operatsııa barysynda jaqsy nátıjege qol jetkizildi, naýqas jalpy palataǵa aýystyryldy. Boljam óte jaqsy, patsıentte ustamalardyń qaıtalaný qaýpi joq», - dedi bólimshe meńgerýshisi Baǵdat Ahyt.
