Sırek kezdesetin jahut: vetnamdyq BAQ Dımash Qudaıbergen týraly jazdy
ASTANA. KAZINFORM — Vetnamdaǵy buqaralyq aqparat quraldary 6 jeltoqsan kúni Hanoı qalasynda ótetin eń iri 8WONDER Winter 2025 festıvalinde óner kórsetetin Dımash Qudaıbergen týraly jazdy. Bul týrady DimashNews saıty jazdy.
Vetnamnyń jetekshi basylymdarynyń biri Saigon Giai Phong festıval týraly habarlaı kele, qazaqstandyq ánshige erekshe toqtalyp ótken.
— Dımash Qudaıbergen — Qazaqstannan shyqqan álemge áıgili ánshi. Ol alty oktava men bes jarty tondy qamtıtyn erekshe daýys dıapazonymen erekshelenedi. Ánshi tyńdarmandaryn tereń ári kúshti barıtonnan bastap, fızıkalyq múmkindikterge baǵynbaıtyndaı kórinetin sırek kezdesetin joǵary notalarǵa deıingi daýystyq múmkindigimen tańǵaldyryp keledi.
Mıllıondaǵan jankúıer Dımashty tek vokaldyq sheberligi úshin ǵana emes, sonymen qatar ánderi arqyly tarıhty jyrlap, til men mádenıet shekaralaryn eńserip, adamdardyń júregine jol taba biletini úshin de qadirleıdi, - dedi atalǵan basylym.
Al Vetnamdaǵy kúndelikti shyǵatyn gazetterdiń biri Tuoi Tre Dımashty «sırek kezdesetin jahut» dep atady.
— Dımash — «Jahut». Óıtkeni ol talantty. Al «sırek» bolatyn sebebi, ol qoǵamdaǵy jalpy aǵymǵa ermeıdi.
Mýzykada algorıtmder men formýlalar ústemdik etken dáýirde Dımash óz jolyn tańdap, klassıkalyq mýzyka, pop, folk jáne opera elementterin úılestire bildi. Ol aǵylshyn, orys, frantsýz, qytaı, arab jáne qazaq tilderin qosa alǵanda, 13-ten astam tilde án aıtady. Árbir til — ol úshin jergilikti mádenıet pen tyńdarmanǵa qurmet bildirýdiń bir túri.
Dımashtyń shyn mánindegi ereksheligi — onyń shyǵarmashylyq ustanymynda. Ol shyǵarmashylyq erkindigin saqtaý úshin, iri dybys jazý kompanııalarymen uzaqmerzimdi kelisimsharttarǵa qol qoımaıdy.
Eshqandaı janjal da, jarnamalyq aıla-sharǵy da joq. Dımash tek ózine laıyq dep sanaǵan týyndylaryn ǵana halyqqa usynady.
Dańq tez kelip, tez umytylatyn ındýstrııada Dımash baıaý, biraq senimdi ári muqııat áreket etedi. Ol — ár notany jarqyraǵansha qyrnaıtyn zerger sekildi. Qoǵam talǵamynyń yqpalyna ermeı, ónerdiń tazalyǵyna adal bolý – búgingi tańda sırek kezdesetin qasıet.
Dımash — naǵyz ónerdiń adamy. Ol úshin jarnamanyń tipti de qajeti joq, oǵan tek shynaıy júrek, názik sezim men minsiz sheberlik kerek, - dep jazdy Tuoi Tre gazeti.
Sonymen qatar sheteldik jýrnalıster tek Dımashtyń bıyl shildede Hanoıdaǵy Ho Guom Opera sahnasynda ótken alǵashqy kontsertin eske alyp qana qoımaı, onyń shyǵarmashylyǵyn tereń zerttep, analıtıkalyq maqalalar men mýzykalyq synshylardyń pikirlerine de nazar aýdaryp jatyr.
Mysaly, Vetnamnyń eń tanymal jańalyqtar saıttarynyń biri VnExpress basylymy jarııalaǵan «Dımash — aspanmen astastan daýys ıesi» atty maqalada jýrnalıst Astana Times gazetinde jarııalanǵan materıaldan úzindi keltiredi.
— Jas bolsa da, Dımash Qudaıbergenniń mýzykasy tyńdarmanynyń tolyqtaı nazary men zeıinin talap etedi. Onyń keıbir ánderi soǵys, ashtyq jáne tabıǵı apat sııaqty qazirgi zamannyń qaıǵyly qubylystaryna degen óz kózqarasyn bildiredi, - delingen atalǵan jazbada.
Maqalada adamzatqa dál osyndaı talant ıeleri qajet ekeni erekshe atap ótiledi.
— Dımash Qudaıbergen tyńdarmanǵa qysym jasap, ózine tabynýdy talap etpeıdi. Kerisinshe, ol árqaısymyzdyń ishimizdegi jaryqty beınelep, sol jaryqty saqtap, ózgelermen bólisý — bizdiń ortaq mindetimiz dep túsinedi, - dep jazǵan maqala avtory.
Eske sala keteıik, budan buryn Dımash Qudaıbergen Vetnamdaǵy mýzykalyq festıvalde án shyrqaıtynyn habarlaǵanbyz.