Sırek kezdesetin metaldar qory týraly derekter qupııasyzdandyrylady

ASTANA. KAZINFORM – Sırek kezdesetin jer metaldarynyń balanstyq qory týraly derekterdi qupııasyzdandyrylady. Bul týraly Úkimet otyrysynda Ónerkásip jáne qurylys mınıstri Qanat Sharlapaev aıtty.

Mınıstrdiń aıtýynsha, geologııa saladaǵy reformalar nátıjesinde elimizge iri halyqaralyq kompanııalar tartyldy. Álemdegi eń iri taý-ken kompanııalarynyń úshtigine kiretin Rio Tinto Aqtóbe oblysynda onnan astam ýchaskede barlaý júrgizip, 2 mlrd teńge kóleminde ınvestıtsııa quıdy. 

- Álemdegi top-ondyqqa kiretin Fortescue kompanııasy Aqtóbe, Qaraǵandy, Abaı jáne Jambyl oblystarynda 32 ýchaskede barlaý jumystaryn júrgizýde. Onyń barlaýǵa salǵan ınvestıtsııasy 4 mlrd teńgeni qurady. Sonymen qatar, VNR, Barrick, Teck Resources jáne First Quantum kompanııalary halyqaralyq masshtabtaǵy ken oryndaryn anyqtaý maqsatynda geologııalyq barlaý jumystaryn belsendi júrgizýde. KIGAM Koreı ınstıtýty Taý-Ken Samruqpen birlesip Aral óńirinde lıtııdiń taralýyn zertteýge kiristi. Jalpy alǵanda, 10 kompanııa quıǵan ınvestıtsııalar kólemi shamamen 41 mlrd teńgeni quraıdy. Bul 25 myń sharshy shaqyrymnan astam aýmaqty zertteýdi qamtamasyz etedi, - dedi Qanat Sharlapaev. 

Onyń atap ótýinshe, sırek kezdesetin metaldar salasyn damytý aıasynda 12 ýchaskede memlekettik geologııalyq izdenis jumystary júrgizilip jatyr.

- Búgingi kúni Kúırektikól ýchaskesi perspektıvaly ken ornyna jatady. Onyń qorynda lantanıdterdi qosa alǵandaǵy 800 myń tonnadaı sırek kezdesetin jer metaldary bar. Bul qordy eki ese arttyrý áleýeti bar. Sondaı-aq, sırek kezdesetin jer metaldaryn barlaý jumystaryn sheteldik Cove Capital jáne HMS Bergbau júrgizýde. Salaǵa ınvestıtsııa tartý maqsatynda osmıı men renııdi qospaǵanda, sırek kezdesetin jer metaldarynyń balanstyq qory týraly derekterdi qupııasyzdandyrý boıynsha jumys júrgizýde. Osy jyldyń sońyna deıin atalǵan jumystardy aıaqtaý josparlanýda, - dedi ol.