Sırek kezdesetin búktemeli dombyra – Petropavlǵa Pavlodar óńiriniń kórmesi keldi
PETROPAVL. KAZINFORM – Soltústik Qazaqstan oblystyq tarıhı-ólketaný mýzeıiniń 100 jyldyq mereıtoıyna oraı Petropavlda «Taý tulǵalarǵa tuǵyr bolǵan qasıetti Pavlodar óńiri» atty kórme jumys istep jatyr. Joba aıasynda Kereký óńirinen SQO-men baılanystyratyn qundy dúnıeler - 100-ge jýyq jádiger ákelingen.
SQO tarıhı-ólketaný mýzeıinde ashylǵan kórmege Grıgorıı Potanın atyndaǵy Pavlodar oblystyq tarıhı-ólketaný mýzeıiniń jáne Maıra Shamsýtdınova atyndaǵy án-óner shyǵarmashylyǵy mýzeı úıiniń jádigerleri – elge tanymal tulǵalardyń jeke zattary men qujattary ákelindi.
Kórmege qoıylǵan eksponattardyń qatarynda Musa Shormanovtyń sham ustaǵyshy, osy óńirden shyqqan ánshi-sazgerlerdiń dombyralary, Sháken Aımanovtyń sahnalyq kostıýmderi, Maıra Ýálıqyzy ustaǵan mýzykalyq aspapqa uqsas - «Talıanka» syrnaıy, halyq ánshisi-sazgerdiń qamzol-shapany bar.
«Eki eldiń tarıhı tulǵalary arasyndaǵy mádenı baılanys sonaý erteden bastalǵan. Bizdiń óńirden shyqqan kınorejısser Sháken Aımanovty Semeı qalasynan Ǵabıt Músirepov Almatyǵa aparyp, juldyzyn jaqqan. Jaıaý Musa da Qyzyljarda turǵan, keıin Ombyǵa barǵan. Qudaıbergen Álseıitov te Qyzyljarda bolǵan, Úkili Ybyraıdan tálim-tárbıe alǵan. Osy Úkili Ybyraıdyń jeldirme janryn Pavlodarǵa aparǵan osy Qudaıbergen aqyn. Estaı Berkimbaev ta osy jaqta Aqan Seri, Birjandarmen birge júrip, óziniń kompozıtorlyq qabiletin shyńdaǵan adam. Sol mádenı baılanysymyzdy biz jalǵastyraıyq dep, Pavlodar óńirinen shyqqan áıgili tulǵalardy tanystyraıyq, kórseteıik degen nıetpen kórmeni ákelip otyrmyz», - deıdi M.Shamsýtdınova atyndaǵy án-óner shyǵarmashylyǵy mýzeı úıiniń basshysy Erlan Rahımov.
Erekshe jádigerlerdiń biri – aıtysker aqyn Qudaıbergen Álseıitovtyń jınalmaly «tumar» dombyrasynyń túpnusqasy. Kórmeni uıymdastyrýshylardyń aıtýynsha, qundy dúnıeni Qudaıbergen Álseıitovtyń jıeni Amangeldi Ýaqpaev mýzeıge tapsyrǵan eken. Arnaıy tapsyryspen jasalǵan dombyra ekige búkteledi, sol sebepti de alyp júrýge yńǵaıly bolǵan.
Pavlodardan ákelingen kórme SQO tarıhı-ólketaný mýzeıinde bir aıǵa jýyq jumys isteıdi. Keıin osy joba aıasynda Qostanaı oblysynyń, Taraz, Qyzylorda qalalarynyń mýzeıleri Petropavl qalasynda osyndaı kórmeler uıymdastyrmaq.
