Sırek kezdesetin júrek aýrýyna shaldyqqan bir jasar sábıge kúrdeli ota jasaldy

QARAǴANDY. QazAqparat – Qaraǵandylyq hırýrgtar «Taýssıg-Bıng anomalııasy» dep atalatyn júrek aqaýy bar bir jasar balaǵa ota jasady. Mundaı júrek aýrýy sırek kezdesedi, sondyqtan operatsııa joǵary tehnologııalyq bolyp sanalady, dep habarlaıdy QazAqparat tilshisi.

Bir jasar bala úshin bul – kúrdeli hırýrgııalyq otanyń ekinshi kezeńi. Dárigerler kúrdeli túzetý operatsııasynyń birinshi kezeńin 2021 jyly, bala 4 aılyq bolǵanda jasady. Kishkentaı naýqas pnevmonııamen jıi aýyrǵan, kógerip, tunshyǵa bergen. Hırýrgter oǵan «Taýssıg-Bıng anomalııasy» dep atalatyn sırek kezdesetin júrek aýrýy degen dıagnoz qoıǵan.

Mine, bala bir jasqa tolǵanda, kardıohırýrgtar ekinshi kezeń – «Glen anastomozy» operatsııasyn jasady. Otadan keıin kishkentaı naýqastyń tynys alýy jeńildedi. Satýratsııa 90%-ǵa deıin kóterildi. Buryn 20%-ǵa deıin tómendep ketetin. Balany alda áli 3-kezeń kútip tur. Ol – 5-6 jasqa tolǵanda jasalatyn operatsııa.

«Bul bala – bizdiń maqtanyshymyz. Ol óte myqty, jigerli. Sebebi, bul – óte aýyr patologııa. Meniń 15 jyldyq tájirıbemde mundaı jaǵdaı ekinshi ret kezdesip otyr. Operatsııalar jasandy qanaınalym júıesin qosý arqyly júrgizildi. Qazir bala qalpyna kele bastady, anasy sábıiniń tábeti paıda bolǵanyn aıtady, salmaq jınaı bastaǵan», - dedi balalar kardıohırýrgııasy bóliminiń meńgerýshisi Janat Bolatbekuly.

Bul operatsııalar joǵary tehnologııalyq otalar qataryna jatady jáne ol medıtsınalyq saqtandyrý qorynan mindetti áleýmettik medıtsınalyq saqtandyrý paketi esebinen óteledi.