Sırek kezdesetin genetıkalyq naýqasqa shaldyqqan balalarǵa memleket kómektesýi tıis - Z.Bálıeva
ASTANA. QazAqparat - Sırek kezdesetin genetıkalyq naýqasqa shaldyqqan balalarǵa memleket tarabynan kómek kórsetilýi tıis. QR Parlamenti Májilisiniń jalpy otyrysynda Úkimet atyna depýtattyq saýal joldaǵan májilismen, Qazaqstandaǵy bala quqyqtary jónindegi ýákil Zaǵıpa Bálıeva osyndaı bastama kóterdi.
Onyń aıtýynsha, býllezdi epıdermolız jáne jetilmegen osteogenez (shyny bala) syndy óte aýyr ári sırek kezdesetin aýrýlardan zardap shekken balalardy emdeýge jáne olardyń zardap shegýin tómendetýge arnalǵan tańý materıaldary Qazaqstanda paıdalanýǵa bolatyn dárilik preparattardyń tizimine engizilgen.
«Býllezdi epıdermologııamen aýyratyn balalardy «kóbelek balalar» dep ataıdy. Bul balalardyń terisine kún saıyn qajetti jaqpa maı jaqpasa jáne arnaıy bıntpen baılamasa onda tosynnan ne bolmasa sál qozǵalys kezinde teri jarylyp ketedi. Teriniń shyryshty betinde kópirshikter paıda bolyp, jaraǵa aınalady. Bul balanyń qatty zardap shegýine ákep soǵady», - dedi ol.
Z.Bálıevanyń sózine qaraǵanda, elimizde ruqsat etilgen jaqpa maı men dári-dármekter tıimsiz. Al qajetti tańý materıaldary Qazaqstan naryǵyna múldem kirgizilmeıdi. Іshki naryqta onyń balamasy joq. Sondyqtan naýqas balalardyń ata-analary qajeti dári-dármek pen tańý materıaldaryn elimizden tysqary aýmaqtan satyp alýǵa májbúr. Jetilmegen osteogenez aýrýyna shaldyqqan balalardyń da jaǵdaıy qıyn. Olardyń súıekteri aıyna 30-50 márte synady. Olarǵa kómektese alatyn «pamıdronat medag» dep atalatyn jalǵyz dári bar. Onyń ózi Qazaqstanda sertıfıkattalmaǵan. Sondyqtan ata-analar mundaı naýqasqa shaldyqqan balalaryn Máskeýge úsh aıda bir ret aparýǵa májbúr. Ár saparǵa shamamen mıllıon teńge qarjy ketedi. Dáriniń ózi de qymbat, shamamen 12 myń teńge turady.
«Osyǵan oraı Imanǵalı Nurǵalıulyna (QR Úkimet basshysynyń orynbasary) kelesi máseleni qarastyrýdy usynamyn. Joǵaryda atalǵan sırek kezdesetin syrqattardy emdeý úshin emdik dári-dármekti, medıkamentterdi, arnaıy tańý materıaldaryn Qazaqstan naryǵynda ruqsat etilgen jáne jiberiletin tizilimge engizý qajet», - dedi Z.Bálıeva.
