Sırek kezdesetin aýrýlardy emdeýge arnalǵan dári-dármekter kóbirek satyp alynady - mınıstrlik
ASTANA. QazAqparat - Qazaqstanda búginde 62 orfandyq (sırek kezdesetin) aýrýlar boıynsha 92 dárilik zatpen tegin qamtamasyz etý júzege asyrylýda, dep habarlaıdy QazAqparat.
«Aǵymdaǵy jyldyń tamyz aıynda Densaýlyq saqtaý mınıstrligi jedel lımfoblastıkalyq leıkemııa, sozylmaly mıeloıdty leıkemııa; Berardınellı-Seıptiń týa bitken jalpylanǵan lıpodıstrofııasy; julyn bulshyqet atrofııasy; neıroblastoma jáne sırek jáne epılepsııanyń farmakorezıstentti nysandary sııaqty dıagnozdary bar orfandyq aýrýlary bar patsıentterdi tegin jáne jeńildikpen ambýlatorııalyq qamtamasyz etýge arnalǵan dárilik zattar men medıtsınalyq buıymdardyń tizbesin keńeıtti», - dep jazdy Densaýlyq saqtaý mınıstrliginen.
Belgili aýrýlar boıynsha (Kıstozdyq fıbroz (Mýkovıstsıdoz), shashyrańqy skleroz, Dıýshenn bulshyqet dıstrofııasy, týberkýlez) ambýlatorııalyq dárilik qamtamasyz etý tizbesi 4 dárilik zatpen tolyqqan.
«Sońǵy 4 jylda orfandyq aýrýlardy emdeýge arnalǵan dári-dármekterdi qarjylandyrý 2,3 ese ósti.
Birlesken jumys sheńberinde jergilikti atqarýshy organdar dári-dármekpen qamtamasyz etýdi qarjylandyrý kólemin ulǵaıtý kózdeýde», - delingen habarlamada.
Aıta keteıik, sırek kezdesetin (orfandyq) aýrýlar – 100 myń halyqqa shaqqanda 10 jaǵdaıda kezdesetin aýrý.
