Sırek dertke shaldyqqan qazaqstandyq búldirshinge qoldaý qajet

ASTANA. QazAqparat – Dúnıe esigin ashqanyna nebári bes aı bolǵan Kereı esimdi sábı aýyr dertke shaldyqqan. Oǵan Túrkııa klınıkalarynyń birinde ota jasaldy. Biraq, shuǵyl operatsııa qaryzǵa jasalǵan. Osy oraıda ata-anasy qazaqstandyqtardan nárestege jasalǵan ota qaryzyn óteý úshin kómek suraıdy, dep habarlaıdy QazAqparat tilshisi.

«Kereı esimdi búldirshin sırek kezdesetin, Qazaqstanda emdelmeıtin dertke dýshar boldy. Alla taǵala saqtap, jany aman qaldy. Ota jasaý (operatsııa) tek Túrkııa mamandarynyń qolynan keledi eken. Kereı batyrdyń saǵaty ótkeli turǵan kezde operatsııany qaryzǵa jasaý degen sheshim qabyldanǵan eken. Jalpy kerek 30 mln teńgeniń jartysy jınaldy, endi 14 mln teńgeden asa soma kerek. El bolyp jınap bersek jaqsy bolar edi. Anyq-qanyǵyn keltirilgen akkaýnt pen telefon arqyly bile alasyz. Aqparattyń shyn ekenine ózim kepildik beremin», - dep jazdy Facebook qoldanýshysy Dýman Qojahmetov.

Sondaı-aq, balanyń ata-anasy otandastarymyzdan emhana aldyndaǵy qaryzdy jabýǵa kómektesýin suraıdy. Olar úshin kez kelgen soma mańyzdy.

«2022 jyldyń 8 jeltoqsanynda Kereı 2 aıǵa tolǵanda óte sırek kezdesetin dıagnoz qoıyldy. Ataýy ót joldarynyń atrezııasy, baýyrdyń qaıtalama bılıarly tsırrozy. Emdeýdiń jalǵyz joly transplantatsııalaý boldy. Otanyń qunyn bilgen soń, 23 jeltoqsanda qazaqstandyq qormen shart jasasyp, 7 qańtarda shuǵyl operatsııaǵa Túrkııanyń «Medıkal park Antalıa» klınıkasyna ushyp bardyq. Kereıdi shuǵyl tekserdi, barlyq analızdi tapsyrdyq, nátıjesi kóńil kónshitpedi. Túrkııada qajetti soma jınalǵansha bir aı kúttik, qoldaý baıaý júrdi. Balanyń baýyry nashar jumys istedi, eger transplantatsııa ýaqytynda jasalmasa, onyń saldary basqa organdarǵa áser etetin boldy. Kereıdiń jaǵdaıyn eskere otyryp, dárigerler ýaqyt joǵaltpastan shuǵyl ota jasady. Ota qaryzǵa jasaldy, shart jasasqan qor bizge kepil boldy. 13 aqpanda Kereıge baýyr transplantatsııasy jasalyp, ol 4 kún boıy reanımatsııada jatty. Qazir balam emhanada em qabyldap, aqyryndap qalypqa kelýde», - dep jazdy sábıdiń anasy Merýert Jomartqyzy.

Kereıge qol ushyn sozýǵa nıettiler úshin rekvızıtter: telefon (+kaspi) [phone], karta 4400 4302 5996 0539 Merýert D.