Syrdarııada muz júrip jatyr
QYZYLORDA. KAZINFORM — Syr óńiri aýmaǵyndaǵy sý sharýashylyǵynyń jaǵdaıy turaqty baqylaýda. Bul týraly Qyzylorda oblysy ákiminiń baspasóz qyzmeti habarlady.
Qazirgi kezde Shardara sý qoımasynan Syrdarııa ózeniniń tómengi aǵysyna sekýndyna 200 tekshe metr, onyń 50 tekshe metri Kóksaraı sý rettegishi arqyly túsip jatyr. Shardarada 1 mlrd 485 mln 48 myń tekshe metr sý jınalǵan.
— Oblys aýmaǵyna sekýndyna kelip jatqan sý kólemi — 179 tekshe metr. Ótken jyly bul kórsetkish 476 tekshe metr boldy. 13 aqpanda Syrdarııa ózeninde muzdyń júrýi bastaldy. Búginde Qarmaqshy aýdanyndaǵy Jańajol eldi mekeniniń tusyna deıin Syrdarııa ózeni ıinderinde qaıtadan muz ustasty. Bul — Qyzylorda sý torabynan tómen 237 shaqyrym. Oblys aýmaǵynda sý basýy yqtımal 31 aımaq bar, — delingen habarlamada.
«Qazgıdromet» RMK oblystyq fılıaly usynǵan málimetke súıensek, Syrdarııa ózeniniń kóktemgi sý tasqyny naýryz aıynyń birinshi onkúndiginde bastalyp, sáýir aıynyń ortasyna deıin sozylady. Sý deńgeıiniń joǵary kezeńi muzdyń júrý jáne keptelý kezinde baıqalady.
— 1 naýryzdaǵy jaǵdaı boıynsha kúnniń sýyq kezeńinde aımaqtyń barlyq aýmaǵynda jaýyn-shashynnyń mólsheri (Aral, Qazaly, Jalaǵash, Qarmaqshy, Syrdarııa, Shıeli, Jańaqorǵan aýdandarynda) normadan 11-84% joǵary boldy. Ótken jylmen salystyrǵanda jaýyn-shashyn mólsheri 24%-dan 110%-ǵa deıin joǵary. Al topyraqtyń tońdanýy Shıeli aýdanynda 0 santımetr, Qazaly aýdanynda 19 santımetr deńgeıinde baqylandy. Topyraqtyń tońdaný tereńdigi Shıeli aýdanynda baıqalmaǵan, al Qazaly aýdanynda 4 santımetrge deıin ulǵaıdy, — delingen fılıal málimetinde.
Oblystyq tótenshe jaǵdaılar departamenti «Qazgıdromet» málimetin negizge alyp, 13 aqpannan 20 naýryzǵa deıin oblys aýmaǵy muzdan tolyq tazartylatynyn alǵa tartty.
2025-2026 jyldarǵa arnalǵan josparǵa sáıkes sý basý qaýpi bar aımaqtarǵa arnaıy tehnıka, kúsh-quraldary bar jaýapty mekemeler bekitildi. Onyń ishinde 101 mekeme 268 arnaıy tehnıka men 1 195 adamdy jumyldyrýǵa daıyn. Sý tasqynyna qarsy materıaldyq-tehnıkalyq qor jetkilikti.
— Yqtımal sý tasqyny kezeńinde qaýipti aımaq turǵyndary 59 evakýatsııalyq jınaqtaý jáne 70 evakýatsııalyq qabyldaý pýnktine kóshiriledi. Jergilikti atqarýshy organdar men tótenshe jaǵdaılar, sý sharýashylyǵy salasynyń mamandary táýlik boıy kezekshilikter uıymdastyryp otyr. «Qazavıaqutqarý» aktsıonerlik qoǵamymen jasalǵan kelisim-shartqa sáıkes 1 tikushaq ázirlendi. Muz jarý úshin mamandandyrylǵan mekememen kelisimshart jasaldy. 2025 jyly 199,1 mln teńge qarjyǵa 11 nysanda qorǵanys bógetteri jóndelip, qalpyna keltirildi. Budan bólek, bıýdjetten tys kózder esebinen Qyzylorda qalasyndaǵy Syrdarııanyń sol jaǵalaýy jóndeldi, — delingen ákimdik habarlamasynda.
Buǵan deıin biz Almaty oblysynda TJD mamandary kóktemdegi sý tasqyny qaýipiniń aldyn alý sharalaryn qolǵa alǵanyn habarladyq.