Syrdarııa-Túrkistan parkinde órt qaýipsizdigin buzǵandarǵa 1 mln teńgeden astam aıyppul salyndy
TÚRKІSTAN. KAZINFORM — Óńirlik tabıǵı parkte órt qaýipsizdigi erejelerin saqtamaǵan 4 azamat ákimshilik jaýapkershilikke tartyldy.
Syrdarııa-Túrkistan memlekettik óńirlik tabıǵı parki KMM Orman qorǵaý ınjeneri Baýbek Quralbektiń aıtýynsha, bıyl órtke qarsy daıyndyq jumystary aıasynda park aýmaǵyndaǵy 2152 shaqyrym mıneraldy jolaqty kútip-baptaý josparlanǵan. Qazirgi tańda onyń 1771 shaqyrymy boıynsha jumystar atqaryldy.
— Jyl basynan beri órt qaýipsizdigi talaptaryn buzǵany úshin 4 azamatqa ákimshilik hattama toltyrylyp, 1 mln teńgeden astam aıyppul salyndy. Sonymen qatar órt qaýipsizdigine qatysty 700 eskertý taqtaıshasy jańartyldy, — dedi ol baspasóz máslıhatynda.
Mekemeniń týrızm bóliminiń meńgerýshisi Áıgerim Tájıevanyń málimetinshe, jyl basynan beri parkke qarasty Boraldaı, Syrdarııa jáne Túrkistan fılıaldaryna 13 myńnan astam týrıst kelgen.
— Park aýmaǵynda úsh aqparattyq beket ornatyldy. Sondaı-aq park aýmaǵynda Boraldaı, Syrdarııa jáne Túrkistan fılıaldary boıynsha jalpy 47,3 gektar jer týrıstik maqsatta uzaq merzimdi paıdalanýǵa berilgen. Qazirgi tańda týrızmdi damytý baǵytynda 14 jer paıdalanýshymen kelisimshart negizinde jumystar júrgizilip jatyr, — dedi spıker.
Buǵan deıin Aqsý-Jabaǵylyda taýǵa shyqqan eki adamnyń biri kóz jumǵanyn habarlaǵan edik.
