Syrdarııa ózeninen 24 zańsyz sý qondyrǵysy tabyldy
QYZYLORDA. KAZINFORM – Sý resýrstaryn retteý, qorǵaý jáne paıdalaný jónindegi Aral-Syrdarııa basseındik ınspektsııasynyń mamandary ótken jyly Syrdarııa ózeninen sýdy zańsyz alyp kelgen 24 tirkelmegen sorǵy qondyrǵysyn anyqtady.
Inspektsııa – Túrkistan, Qyzylorda oblystaryndaǵy jáne Shymkent qalasyndaǵy sý qoryn retteý, paıdalaný jáne qorǵaý salasyndaǵy óńirlik organ. Zańsyz qondyrǵylar osy úsh aýmaqta tirkeldi.
- Sýdyń kóleńkeli naryǵymen aınalysqandarǵa birden aıyppul salmaı, aldymen túsindirý jumysyn júrgizdik. Ótken jyly osyndaı 350-den astam is-shara uıymdastyryldy. 447 ákimshilik hattama toltyrylyp, 50 mln 500 myń teńge, onyń ishinde zańsyz sý paıdalanǵandarǵa 18 mln teńge aıyppul salyndy. Sý kodeksiniń talaby boıynsha sý paıdalanýshy jerdiń astynan, ústinen sý alý úshin mindetti túrde arnaıy qujat rásimdeýi kerek. Inspektsııanyń ruqsatyn alǵannan keıin tıisti mekemeler tutynýshyǵa kelisimshart arqyly sý jetkizip beredi. Kelisimshartsyz jáne arnaıy qujatsyz sý paıdalanatyndardyń áreketi zańsyz bolyp esepteledi, - dedi ınspektsııa basshysy Zeınolla Qaztoǵanov.
Onyń aıtýynsha, 2024-2028 jyldarǵa arnalǵan sý sharýashylyǵyn damytýdyń keshendi josparyna sáıkes taıaý bolashaqta barlyq kanaldy avtomattandyrý, tsıfrlandyrý múmkindigi qarastyrylyp otyr. Bul kimniń qansha sý alyp jatqanyn anyqtaýǵa múmkindik beredi, ıaǵnı sýdyń artyq aınalymy tyıylady.
- Sý kodeksiniń eń birinshi maqsaty – sýdy únemdep jáne qaıtadan paıdalaný. Oblysta sýdy ekinshi márte paıdalaný tehnologııalaryn qoldanatyn 12 kásiporyn, onyń ishinde munaı kompanııalary da bar. Atalǵan tehnologııa boıynsha munaımen ilesip keletin sýdy alyp, tazalap, jerdiń qyrtysyn saqtap qalý úshin qaıtadan tómen qaraı tastaıdy. Mundaı kásiporyndar bizge eki jyldyń ishinde sýdy tıimdi paıdalaný josparyn usynady, al ony bes jylda júzege asyrýy qajet, - dedi ınspektsııa basshysy.
Buǵan deıin biz oqyrman nazaryna ınspektsııa basshysymen Ortalyq Azııadaǵy eń iri ózen – Syrdarııa men Kishi Araldyń qazirgi jaǵdaıy, ony saqtap qalýdyń joly jónindegi suhbatty usyndyq.