Syrdarııa ózeninde 9 zańsyz sorǵy qondyrǵysy anyqtaldy

Aral-Syrdarııa basseındik ınspektsııasynyń mamandary Syrdarııa ózeninen sýdy zańsyz alyp kelgen 9 tirkelmegen sorǵy qondyrǵysyn anyqtady.

Nátıjesinde 9 ákimshilik is qozǵalyp, zań buzǵandarǵa jalpy somasy 1,7 mln teńge kóleminde aıyppul salyndy.

Jalpy jyl basynan beri Aral-Syrdarııa basseındik ınspektsııasy arnaıy sý paıdalanýǵa ruqsatsyz sýdy paıdalanǵan 62 adamdy anyqtady. Quqyq buzýshylarǵa salynǵan aıyppuldardyń jalpy somasy 12,7 mln teńgeden asty.

Sonymen qatar ınspektsııa mamandary 73 eldi mekende jańa Sý kodeksiniń kúshine enýine qatysty túsindirý jumystaryn júrgizdi.

Sýdy josyqsyz paıdalanǵan bir faktini Tobyl-Torǵaı basseındik ınspektsııasy anyqtady. Atap aıtqanda, negizgi sý qubyrynda aǵyp ketý jáne sý eseptegish qurylǵysynyń isten shyqqany tirkeldi. Nátıjesinde sý paıdalanýshyǵa aıyppul salynyp, anyqtalǵan buzýshylyqtardy joıý týraly nusqama berildi.

«Qazirgi ýaqytta barlyq basseındik ınspektsııa sý zańnamasynyń buzylýyna únemi monıtorıng júrgizedi. Sondaı-aq sý paıdalanýshylarmen jańa Sý kodeksi, sýarmaly sýdy paıdalaný erejeleri, arnaıy sý paıdalanýǵa ruqsat rásimdeý jáne sý únemdeý tehnologııalaryna kóshý qajettiligi máseleleri boıynsha túsindirý jumystary júrgizilip jatyr», - dedi SRIM Sý resýrstaryn retteý, qorǵaý jáne paıdalaný komıteti tóraǵasynyń orynbasary Temirlan Ábdiqulov.

Aıta keteıik, sýarý kezeńi aıaqtalǵansha Qazaqstan Syrdarııa arqyly taǵy 1,5 mlrd tekshe metr sý alady.