Syrdarııa ózeni arqyly Shardara sý qoımasyna 16 mlrd tekshe metr sý keledi — mınıstrlik
ASTANA. KAZINFORM — Bıyl Ortalyq Azııa elderindegi áriptestermen birneshe kezdesý ótkizip, Qazaqstanǵa keletin sý kólemi kelisilmek. Bul týraly Sý resýrstary jáne ırrıgatsııa mınıstrliginiń baspasóz qyzmeti habarlady.
Sý resýrstary jáne ırrıgatsııa mınıstrligi 2024 jyly kórshi eldermen transshekaralyq ózender máseleleri boıynsha komıssııalar men jumys toptarynyń 44 otyrysyn ótkizdi.
Onyń ishinde 25 is–shara Ortalyq Azııa elderimen Syrdarııa, Shý jáne Talas ózenderi boıynsha ótti. Júrgizilgen kelissózder nátıjesinde ótken sýarý maýsymynda elimizdiń ońtústigindegi sharýalardyń sýarmaly sýǵa suranystary tolyq qanaǵattandyryldy. Soltústik Aralǵa qosymsha sý jiberildi jáne Ózbekstanmen birlesip Syrdarııa ózenindegi sýdy esepke alýdyń zamanaýı júıeleri ornatylatyn 10 sý beketi anyqtaldy.
Qytaı jáne Reseıdiń sý sharýashylyǵy vedomstvolarymen birlesken 19 otyrys ótti. Nátıjesinde Sý resýrstary jáne ırrıgatsııa mınıstrligi men QHR Sý sharýashylyǵy mınıstrligi arasynda sý resýrstary salasyndaǵy ózara túsinistik jáne yntymaqtastyq týraly memorandým jobasy kelisildi. Mańyzdy qujatqa bıyl qol qoıý josparlanyp otyr. Reseı Federatsııasymen sý tasqynyn ótkizý kezinde ózara is-qımyl jónindegi birlesken jumys toby quryldy.
Bizdiń mınıstrlik transshekaralyq sýlardy bólý jáne sý tasqynynyń aldyn alý máseleleri boıynsha kórshi eldermen belsendi is-qımyldy jalǵastyrady. Bıyl Ortalyq Azııa elderindegi áriptesterimizben birneshe kezdesý ótkizip, Qazaqstanǵa keletin sý kólemin kelisemiz. Máselen, Ózbekstanmen kelissózder nátıjesinde 2025 jyldyń qazanyna deıin Syrdarııa ózeni arqyly Shardara sý qoımasyna 16 mlrd tekshe metr sý keledi dep kútilýde, — dedi Sý resýrstary jáne ırrıgatsııa mınıstrligi Halyqaralyq yntymaqtastyq departamenti dırektorynyń mindetin atqarýshy Danııar Shárip.
Aıta ketelik elimiz Jaıyq, Syrdarııa, Ertis, Іle ózenderi arqyly kórshi elderden qansha sý alatyny týraly jazǵan edik.