Syrdarııa arqyly keletin sý kóleminiń sý tasqynyna áseri bolmaıdy — «Qazsýshar»
QYZYLORDA. KAZINFORM — Qyzylorda oblysyndaǵy sý salasynyń ókilderi Syrdarııa ózenindegi sý deńgeıi jáne kóktemgi sý tasqynyna daıyndyq týraly aıtyp berdi.
Toqtaǵul, Ándijan, Bahrı-Tochık, Sharbaq sý qoımalary Shardara sý qoımasynan joǵary ornalasqan. Olardyń jalpy jobalyq sý jınaý kólemi — 26,6 mlrd tekshe metr. Búgin, ıaǵnı 11 naýryz kúni nebári 47%-y (jınalǵany — 12,4 mlrd tekshe metr) ǵana tolǵan. Munyń ózi ótken jylmen salystyrǵanda 1,3 mlrd tekshe metrge kem.
— Qazirgi ýaqytta Shardaraǵa 5 009 mln (2025 jyly — 4 669 mln tekshe metr), Kóksaraı sý rettegishine 1 543,37 mln (2025 jyly — 1 189,33 mln tekshe metr) tekshe metr sý jınalǵan. Shardaraǵa sekýndyna 1176,4 (2025 jyly — 842,9 tekshe metr) tekshe metr sý tústi. Sý qoımasynan Syrdarııa ózenimen sekýndyna 600 (2025 jyly — 500 tekshe metr) tekshe metr sý jiberilip, Kóksaraı sý rettegishi odan sekýndyna 150 tekshe metr kólemde qabyldap, ózenniń tómengi aǵysyna sekýndyna 150 tekshe metr jiberilip jatyr, — dedi Aral-Syrdarııa basseındik ınspektsııasy basshysynyń orynbasary Seıitqasym Ábýov.
Manap, Qumsaı sý qoımalaryna sý túsip jatqan joq. Qazirgi kezde Qyzylorda sý torabynan 365 shaqyrym, al Josaly kentinen 73 shaqyrym tómen Qyzyljar ýchaskesiniń tusynda Syrdarııa ózeninde seń júrip keledi. Mamandar oblys aýmaǵynda sý sharýashylyǵynyń jaǵdaıy turaqty dep baǵalap otyr.
«Qazsýshar» RMK oblystyq fılıalynyń málimetinshe, Syr óńirinde bıyl aqpan aıynyń aıaǵy men naýryz aıynyń basynda aýa raıynyń jylynýynan ózenniń ońtústik jáne ortalyq bóligi muzdan tolyq tazardy. Muzdyń ortasha qalyńdyǵy Qazaly jáne Aral aýdandarynyń aýmaǵynda 5-18 santımetr shamasynda.
— Qyzylorda qalasy jáne Syrdarııa aýdandarynyń tusynda ózenniń muzdan tolyq tazarýyna sáıkes 22 aqpannan bastap Qyzylorda sý toraby men Áıtek sý toraptary retteldi. Birqatar kanalǵa kólder júıeleri men shabyndyq jaıylymdyqtaryn sýlandyrý úshin sý jiberilip jatyr. Qazaly jáne Aqlaq sý toraptary aýmaǵyndaǵy Syrdarııa ózeni muzdan tolyq tazarmaǵan soń tranzıttik rejımde jumys jasap tur. Qazaly sý torabyndaǵy muz keptelisiniń aldyn alý maqsatynda muz jarýǵa arnalǵan tehnıkany kezekshilikke qoıdyq. Kókbulaq sý beketinde sý kóleminiń ulǵaıýyna baılanysty 10 naýryzda Shardara sý qoımasynda sý josparly kólemge jetkendikten onyń jumys rejımi ózgerdi. Syrdarııa ózeniniń tómengi aǵysyna jiberiletin sý kólemi ulǵaıdy. Endi Syrdarııa arqyly keletin sýdy tıimdi paıdalaný úshin kanaldardan sý alý kestesi ázirlenip, sýarý naýqanyna deıin kólder júıeleri men shabyndyq jaıylymdyqtaryn toltyrýǵa kiristik, — dedi fılıal dırektorynyń orynbasary Aıdos Asanbaev.
«Qazsýshar» ókili Syrdarııa ózeni arqyly keletin sý kóleminiń sý tasqynyna áseri bolmaıtynyna sendirdi.
— Jańaqorǵan aýdanyndaǵy Jıdeli jáne Besaryq sý qoımalarynyń negizgi sý kózi — taýǵa túsetin jaýyn-shashyn men qar eritindileri. Búgingi kúni Jıdeli sý qoımasynyń jobalyq syıymdylyǵy 8,7 mln tekshe metrge jetse, Besaryqtyń 67%-y toldy. Sý qoımalarynyń sý deńgeıi kúndelikti baqylaýymyzda, — dedi ol.
Aıta keteıik, Qazaqstan óńirlerinde sý tasqyny qaýpin azaıtýǵa, muz keptelisiniń aldyn alýǵa jáne tasqyn sýdyń qaýipsiz ótýin qamtamasyz etýge baǵyttalǵan keshendi aldyn alý sharalary jalǵasyp jatyr.