Syr óńiriniń oqýshylary «Eń úzdik olımpıadalyq komanda» nomınatsııasyn jeńip aldy
QYZYLORDA. KAZINFORM — Búgin oblys ákimi Murat Ergeshbaev halyqaralyq, respýblıkalyq pándik olımpıada, ǵylymı joba konkýrstarynyń jeńimpazdarymen jáne olardyń jetekshi ustazdarymen kezdesti, dep habarlaıdy oblys ákiminiń baspasóz qyzmeti.
Kezdesýde Memleket basshysynyń bilim men ǵylymǵa umtylysty qoldaýynyń arqasynda óńirde aýqymdy jumys atqarylyp jatqanyn atap ótti.
— Memleket basshysy Qasym-Jomart Kemeluly: «Rasynda, darynǵa ıe bolý, bul — baqyt. Biraq jaı ǵana eńbeksiz daryn jetistiktiń kepili bola almaıdy. Darynnyń kózin ashý kerek jáne ony tolyǵymen paıdalana bilý qajet. Ár jeńis, ár medal tynymsyz izdenispen, mańdaı termen, úzdiksiz daıyndyqpen keledi, — degen bolatyn. Dana halqymyz «Bilim — taýsylmaıtyn ken» dep beker aıtpaǵan. Qaı zamanda bolsyn, eldiń eńsesin tiktep, bolashaǵyn baıandy etetin kúsh — bilimdi urpaq. Syr óńiriniń ǵana emes, kúlli Qazaqstannyń mereıin ústem etip júrgen Ózderińizdeı talapty da talantty jastarmen kezdesýdiń máni zor, — dedi Murat Nálqojauly.
Bıyl 29 oqýshy halyqaralyq olımpıadalardyń júldegeri atansa, 143 oqýshy respýblıkalyq olımpıada, ǵylymı joba baıqaýlarynda úzdik nátıje kórsetti.
Jalpy bilim beretin pánder boıynsha respýblıkalyq olımpıada qorytyndysymen Qyzylorda oblysynyń komandasy «Eń úzdik olımpıadalyq komanda» nomınatsııasyn ıelendi. Sonymen qatar, eki oqýshy joǵary oqý oryndarynyń bilim grantyn jeńip aldy.
Saltanatty jıynda 30 jetekshi ustaz oblys ákiminiń Alǵys hatymen marapattalyp, shıpajaıǵa joldama aldy. Halyqaralyq jáne respýblıkalyq bilim dodalarynda úzdik nátıje kórsetken 36 oqýshyǵa oblys ákiminiń Alǵys haty men planshet tabystaldy. Oqýshylar men ustazdar oı-pikirlerin ortaǵa salyp, usynystaryn jetkizdi.
Aıta keteıik, keıingi jyldary Memleket basshysynyń, Úkimettiń qoldaýymen óńirde 200-den astam áleýmettik nysan paıdalanýǵa berildi. Onyń ishinde bilim berý salasynda 46 jańa nysan iske qosyldy. «Keleshek mektepteri» ulttyq jobasy aıasynda 10 jańa mektep salyndy. Fızıka-matematıka baǵytyndaǵy «Bilim-ınnovatsııa» lıtseı-ınternaty men mýzykalyq kolledjdiń jańa ǵımaraty paıdalanýǵa berildi.
Oqýshylar saraıy, «Syr juldyzdary» akademııasy, Jalaǵash, Jańaqorǵan jáne Shıeli aýdandarynda «Oqýshylar úıi» men «Óner mektebi» iske qosyldy. Jaqynda jańa balalar tynyǵý lageri paıdalanýǵa berilip, alǵashqy demalýshylardy qabyldady. Búgin Prezıdent saıabaǵyndaǵy Botanıkalyq bilim berý ortalyǵy el ıgiligine tabystaldy.
