Syr óńirindegi Baqatam kesenesi men Syǵanaq qalashyǵy qalpyna keltirilip jatyr
QYZYLORDA. KAZINFORM — Mádenıet jáne aqparat mınıstrliginiń josparyna sáıkes bıyl Qyzylorda oblysyndaǵy respýblıkalyq mańyzy bar tarıhı-mádenı eskertkishter restavratsııadan ótip jatyr.
Qazaly aýdanyndaǵy Baqatam kesenesi men Jańaqorǵan aýdanyndaǵy Syǵanaq qalashyǵyn qalpyna keltirýdi «Qazqaıtajańartý» RMK mamandary qolǵa alǵan.
— Baqatam kesenesindegi jumys tolyq aıaqtaldy. Restavratsııa barysynda eskertkishtiń tehnıkalyq jaǵdaıyna ǵylymı zertteý júrgizildi. Konstrýktsııalyq kúsheıtý, jikterdi qaıta óńdeý, joǵalǵan sáýlettik bólshekterdi ǵylymı negizde tolyqtyrý jáne tarıhı materıalǵa sáıkes restavratsııalyq kirpishpen qaıta qalaý jumysy oryndaldy. Sonymen qatar kúmbezdiń qorǵanysh sylaq qabaty jańartyldy. Sýdan oqshaýlanyp, aýmaǵy abattandyryldy. Atalǵan sharalar eskertkishtiń tarıhı sáýlettik kelbetin saqtaı otyryp, onyń uzaqmerzimdi saqtalýyn qamtamasyz etedi, — dedi oblystyq tarıhı-mádenı murany qorǵaý ortalyǵynyń bólim meńgerýshisi Talǵat Berdıev.
Syǵanaq qalashyǵyna restavratsııa jasaýdaǵy negizgi maqsat — tarıhı-mádenı mura nysanyn saqtap qalý, onyń bastapqy sáýlettik kelbetin ǵylymı negizde qalpyna keltirý jáne arheologııalyq qundylyǵyn bolashaq urpaqqa jetkizý. Josparǵa sáıkes arheologııalyq qazba barysynda arshylǵan 2 kesene men turǵyn úı ornynyń bir bóligi qalpyna keltiriledi.
— Syǵanaq qalasynyń ataýy H ǵasyrdan bastap túrki jáne parsy-arab tarıhshylarynyń jazbalarynda kezdesedi. Ortaǵasyrlyq derekterge qaraǵanda qala HІ-HІІІ ǵasyrlarda Deshti-Qypshaq eliniń, HІІІ-HІÚ ǵasyrlarda Aq Ordanyń, HÚ-HÚІІ ǵasyrlarda Qazaq handyǵynyń elordasy bolǵan. Túrli tarıhı kezeńdi basynan ótkizgen qala HÚІІІ ǵasyrǵa deıin ómir súrgen. Syǵanaqtyń «Qypshaq dalasynyń aılaǵy» dep atalýy áıgili Uly Jibek joly boıyndaǵy qalanyń sharýashylyǵy men áleýmettik-ekonomıkalyq áleýeti joǵary deńgeıde damyǵanyn ańǵartady, — dedi Talǵat Berdıev.
Buǵan deıin habarlaǵanymyzdaı, Túrkistan oblysynyń Saýran aýdanyndaǵy Saýran qalashyǵynda ǵylymı-restavratsııalyq jumystar bastaldy.
