Syr óńirinde «Móldir bulaq» aptalyǵy qorytyndylandy
QYZYLORDA. KAZINFORM — Qyzylorda oblysynda «Taza Qazaqstan» respýblıkalyq aktsııasy aıasynda «Móldir bulaq» aptalyǵy qorytyndylandy.
Jalpy aktsııanyń maqsaty — tabıǵatty taza ustap, turǵyndar arasynda ekologııalyq mádenıetti arttyrý.
Uıymdastyrylyp jatqan tazalyq sharalary nátıjesinde sý aıdyndary men ózen, kólder jaǵalaýlary jáne aıaqsý aryqtarynyń boıy tazartyldy.
«Móldir bulaq» aptalyǵy aıasynda 20 myńnan astam adam, sonyń ishinde memlekettik mekemeler men jeke uıymdar, jastar jáne volonterler, turǵyndar qatysyp, barlyǵy 245 tehnıka jumyldyryldy.
Tazalyq aptalyǵy aıasynda oblystaǵy «Syrdarııa» ózeniniń jaǵalaýy, «Aqqumshyq» jaǵajaıy, «Káribóget» kópiri, «Laıkól», «Qambash», «Jalańash», «Shómishkól», «Raıym», «Tuşy», «Iirkól», «Qaraózek», «Álimkól», «Jamankól» kólderiniń jáne «Qalǵandarııa», «Eltaı», «Shirkeıli» jáne basqa sý arnalarynyń jaǵalaýyn qoqystan, turmystyq qaldyqtardan tazartý jumystary júrgizildi.
Jalpy ekoaktsııa aptalyǵy aıasynda sý aıdyndary men aıaqsý aryqtary 40 tonnadan astam qoqystan tazartyldy.
Eske sala ketsek, «Taza Qazaqstan» ekologııalyq aktsııasy aıasynda oblys ákimi N. Nálibaevtyń ekologııalyq naýqanǵa aımaq jurtshylyǵyn belsene qatysýǵa shaqyrǵan úndeýi jarııalanyp, oblys kóleminde sanıtarlyq tazartý, kórkeıtý jáne kógaldandyrý boıynsha senbilikter uıymdastyrylýda.
Oblys kóleminde kórkeıtý-kógaldandyrý jáne sanıtarlyq-tazalyq jumystary tek aktsııa aıasynda ǵana emes aımaqtaǵy barlyq eldi mekenderde kóktemniń alǵashqy kúni 1 naýryzdan bastaý alǵan bolatyn.
