Syr óńirinde kúrish jınaý naýqanyna alǵashqy oraq tústi
QYZYLORDA. KAZINFORM — Búgin Qyzylordada «Dala kúni — 2026» is-sharasynda Y.Jaqaev atyndaǵy Qazaq kúrish sharýashylyǵy ǵylymı-zertteý ınstıtýtynyń egis alqabyna alǵashqy oraq salý rásimi ótti, dep habarlaıdy oblys ákiminiń baspasóz qyzmeti.
Oǵan oblys ákimi Murat Ergeshbaev, Aýyl sharýashylyǵy vıtse-mınıstri Ermek Kenjehanuly, Sý resýrstary jáne ırrıgatsııa vıtse-mınıstri Jandos Salımov, Ulttyq agrarlyq ǵylymı-bilim berý ortalyǵynyń basqarma tóraǵasy Baýyrjan Asanov, mınıstrlik ókilderi, elimizdiń jetekshi ǵylymı-zertteý ınstıtýttarynyń basshylary, qala jáne aýdan ákimderi, oblystyq basqarmalar men departamentterdiń basshylary, sý sharýashylyǵy mekemeleri men sharýa qojalyqtarynyń tóraǵalary, qarjy ınstıtýttarynyń ókilderi qatysty.
Aımaq basshysy eńbekkerlerdi quttyqtap, bıylǵy jaýapty naýqanǵa daıyndyq barysynda atqarylǵan jumystarǵa toqtaldy.
— Syr eli — ejelden dıqanshylyq dástúri ornyqqan berekeli óńir. Aq kúrishimen aty shyqqan aımaq búginde elimizdiń azyq-túlik qaýipsizdigine eleýli úles qosyp keledi. Memleket basshysy Qasym-Jomart Kemeluly jahandyq azyq-túlik naryǵynda básekege qabilettilikti arttyrý úshin ǵylymdy damytýdy, sonyń ishinde tuqym sharýashylyǵyn jandandyrýdy atap ótken bolatyn. Basty mindet — dástúrli salanyń áleýetin zamanaýı tehnologııa, ǵylym jáne ınnovatsııamen sabaqtastyryp, sý resýrstaryn tıimdi paıdalaný arqyly mol ónimge qol jetkizý. Bul rette memlekettik qoldaý men ǵylym múmkindigin sharýalardyń tájirıbesimen ushtastyrý mańyzdy. Barsha dıqan qaýymyn kúrishke oraq túsýimen quttyqtaımyn! Eńbekterińiz berekeli bolyp, aq kúrishten mol ónim jınalsyn. Syr óńiriniń yrysy arta bersin! — dedi Murat Nálqojauly.
Basqosýda ala jazdaı aptap ystyqta mańdaı terin tógip, el yrysyn eselegen mártebeli eńbek adamdary marapat tórinen kórindi.
Jıynda aýyl sharýashylyǵy tehnıkalarynyń kórmesi uıymdastyrylyp, qatysýshylar zamanaýı tehnıkalarmen jáne olardyń múmkindikterimen tanysty.
Y. Jaqaev atyndaǵy Qazaq kúrish sharýashylyǵy ǵylymı-zertteý ınstıtýty — kúrish selektsııasymen jáne tuqym sharýashylyǵymen aınalysatyn biregeı agrarlyq uıym. Bıyl ınstıtýttyń materıaldyq-tehnıkalyq bazasyn jańǵyrtýǵa respýblıkalyq bıýdjetten 4,2 mlrd teńge bólinip, zamanaýı selektsııalyq tehnıkalar men tuqym zaýyttary alyndy. Bul tuqym sharýashylyǵynyń damýyna, onyń ishinde otandyq kúrish sorttarynyń sapasy men egis kóleminiń artýyna oń áserin tıgizeri sózsiz.
Qabyldanǵan júıeli sharalardyń nátıjesinde vegetatsııalyq kezeń turaqty ótip, egis alqaptary josparǵa sáıkes sýmen qamtamasyz etildi. Odan bólek, sý únemdeý tehnologııalaryn qoldaýǵa 2026-2028 jyldarǵa 34 mlrd. teńgeden astam qarjy bólindi.
Memleket basshysynyń sýdy kóp qajet etetin daqyldar kólemin ońtaılandyrý tapsyrmasyna sáıkes, bıyl kúrish alqaby qysqartylyp, 70 myń gektarǵa egildi. Sý únemdeý tehnologııalaryn engizý jáne ártaraptandyrý baǵytynda iri ınvestıtsııalyq jobalar qolǵa alyndy.
