Syr elinde «Jasyl aımaq» aptalyǵy aıasynda jalpyoblystyq senbilik ótti
QYZYLORDA. KAZINFORM - Memleket basshysynyń bastamasymen elimizde «Taza Qazaqstan» respýblıkalyq ekologııalyq aktsııasy Syr óńirinde qarqyndy túrde jalǵasýda. Ekoaktsııanyń ár aptasy arnaıy taqyryptarǵa negizdelgen.
«Jasyl aımaq» ataýymen jalǵasqan úshinshi aptasynda saıabaqtar, skverler, parkter men alleıalar aýmaqtaryn abattandyrý, qoqystardan tazartý, aǵash otyrǵyzý syndy jumystar belsendi júrgizilýde.
Atap aıtqanda, ardagerler qaýymy «Atadan mal qalǵansha, tal qalsyn» degen támsildi ustanyp, «Jasyl aımaq» aktsııasyna bir aýyzdan ún qosty. Shara barysynda oblystyq ardagerler keńesi tóraǵasynyń orynbasary Ó.Shámenov bastaǵan qazynaly qarttarymyz Qorqyt ata eskertkishi mańyna gúl egip, aınalany taza ustaýǵa shaqyrdy.
Al, aımaqtyń belsendi jastary qaladaǵy Syr talyn egip, «Jasyl aımaq» aptalyǵyna qoldaý bildirdi. Budan bólek, olar ekoaktsııany qyzyqty ári erekshe ótkizý maqsatynda turǵyndarǵa balmuzdaq taratyp, eskertkish aýmaǵynda «Baýyrsaq paty» sharasy uıymdastyryldy.
Syr ustazdary da respýblıkalyq ekologııalyq aktsııaǵa erekshe qoldaý bildirdi. Bilim salasynyń qyzmetkerleri men bir top ÚEU ókilderi jáne de «Amanat» partıasynyń «Jastar rýhy» Jastar qanatynyń belsendileri qaladaǵy B.Shókenov atyndaǵy saıabaqta aǵash dińgekterin áktep, aýmaqty túrli qoqystardan tazartty. Shara barysynda «Karaoke battl», «Baýyrsaq party» sekildi erekshe baǵyttaǵy is-sharalar uıymdastyrylyp, túrli beınedegi anımatorlar turǵyndardy qýanyshqa bóledi.
Sonymen qatar, ıgilikti sharaǵa 100-ge jýyq medıtsına salasynyń qyzmetkeri óz úlesterin qosyp, oblystyq medıtsınalyq ortalyqtyń aldyna aǵash kóshetterin otyrǵyzdy.
Jańadan shańyraq kótergen 10 jas otbasy ótken jyly el ıgiligine tabystalǵan «Otbasy ortalyǵynyń» aýmaǵyna aǵash kóshetterin otyrǵyzdy. Shara sońynda jas otbasylar estelik retinde fotozonalarda túsirilim jasap, kóterińki kóńil kúıde sharany qorytyndylady.
Jalpyoblystyq senbilik aýdandarda da máni-mazmuny aıshyqtalǵan erekshe is-sharalarmen jalǵasýda. Atap aıtqanda, araldyqtar aýdan kóleminde aǵash kóshetteri men gúl otyrǵyzý jumystaryn belsendi júrgizdi. Bıyl Aral qalasynda 3000 túp aǵash otyrǵyzý mejelengen.
Qazaly aýdanynyń turǵyndary da ıgi bastamany qoldaı otyryp, atalǵan aktsııaǵa erekshe atsalysty. Aýdandaǵy densaýlyq saqtaý uıymdary qyzmetkerleriniń qatysýymen Áıteke bı kenti Janqoja batyr kóshesindegi sý arnalaryn qoqystan tazartty. Budan bólek, aýdanda 300 túp qalamsha men gúl kóshetteri otyrǵyzyldy.
Qarmaqshy aýdanynda ekoaktsııa aıasynda aýdan ardagerleri, belsendi jastar jáne mádenıet qyzmetkerleriniń qatysýymen Josaly kentindegi «Jeńis» saıabaǵyna 200 túp aǵash otyrǵyzdy.
Eńbektiń kózin tapqan 41 Sotsıalıstik Eńbek Eri shyqqan Shıeli aýdanyndaǵy irgeli ýran óndiretin kásiporyndar «Rý-6», Semizbai-U JShS-niń Iirkól kenishi qyzmetkerleri de mekeme aýmaǵyn kógaldandyryp, abattandyrdy.
Al, jańaqorǵandyqtar aýdan ortalyqtarynda ornalasqan «Praım park» saıabaǵyna tazalyq sharalaryn júrgizdi.
