Syr elinde Isataı Ábdikárimovti eske alý sharalary ótip jatyr
Qyzylorda qalasynda memleket jáne qoǵam qaıratkeri, Sotsıalıstik Eńbek Eri Isataı Ábdikárimovtiń 100 jyldyǵyna arnalǵan is-sharalar ótip jatyr. Eske alý sharalary oblys ákimdigindegi «Isataı Ábdikárimov: Azamat. Tulǵa. Qaıratker» atty ǵylymı-tanymdyq konferentsııadan bastaldy. Kazinform Qyzylorda oblysy ákiminiń baspasóz qyzmetine silteme jasap.
Ult qaıratkerin ulyqtaýǵa arnalǵan konferentsııaǵa QR Ulttyq ǵylym akademııasynyń akademıgi Murat Jurynov, QR Ulttyq ınjenerlik akademııasynyń akademıgi Turlybek Iskakov, boksshy, KSRO eńbek sińirgen sport sheberi Serik Qonaqbaev, QR Ulttyq qaýipsizdik komıtetiniń general-leıtenanty Oleg Bıjanov, elimizdegi qarjy ınstıtýtynyń damýyna úles qosqan qaıratker Erlan Tatıshev, memleket jáne qoǵam qaıratkerleri, zııaly qaýym ókilderi, Isataı Ábdikárimulynyń urpaqtary, týǵan-týystary men úzeńgiles inileri qatysty.
Oblys ákimi Nurlybek Nálibaev aımaqtyń 85 jyldyq mereıtoıyn atap ótýde ǵylymı-tanymdyq, mádenı-kópshilik sharalarǵa negizgi basymdyq berilgenin aıtty. Onyń ishinde, oblystyń damýynda ózindik qoltańbasy bar azamattar esimin ulyqtaýǵa arnalǵan taǵylymdy sharalardyń orny erekshe.
«Isataı aǵamyz Qyzylorda oblysyn basqarǵan tusta elge sińirgen eńbegi úshin jurtshylyqtyń erekshe súıispenshiligine ıe boldy. Qyzylorda oblysy Keńes Odaǵy boıynsha kúrishtiń 25 paıyzyn óndirip, yrysty, kúrishti Syr eline aınaldy. Isataı Ábdikárimulynyń tusynda sharýashylyq basshylary, kúrishshiler, malshylar, mehanızatorlar, jalpy sany 6 adam Sotsıalıstik Eńbek Eri ataǵyn aldy. Aǵamyz Qazaq SSR Joǵarǵy keńesi prezıdýmynyń tóraǵasy qyzmetinde de abyroıly boldy. Qaı qyzmette júrse de qaıratkerlik qabiletin kórsetti.
Oblysymyzdyń shejiresindegi damý úrdisteri búgin de jalǵasýda. Kúni keshe Memleket basshysy Qasym-Jomart Kemeluly Toqaev arnaıy jumys saparymen kelip, óńirdiń áleýmettik-ekonomıkalyq damýymen tanysty. Zııaly qaýym qatysqan konferentsııany paıdalanyp, Prezıdentimizdiń óńir halqyna degen ystyq yqylasyn, birlesip atqarǵan jumysymyzǵa bergen joǵary baǵasyn ózderińizge jetkizgim keledi. Bul baǵa – eldiń birligi men tatý tirliginiń nátıjesi jáne aǵalarymyz salyp bergen sara joldyń sabaqtastyǵy dep bilemin», – dedi aımaq basshysy.
Jıynda Senat tóraǵasy Máýlen Áshimbaev pen Májilis tóraǵasy Erlan Qoshanovtyń, Ózbekstan Respýblıkasynyń memlekettik jáne saıası qaıratkeri Murat Kamalovtyń arnaıy quttyqtaý hattary oqyldy.
Konferentsııada akademıkter Murat Jurynov, Turlybek Iskakov, oblystyq máslıhat tóraǵasy Naýryzbaı Baıqadamov, Qorqyt Ata atyndaǵy Qyzylorda ýnıversıtetiniń prorektory Jandos Bazartaı, qoǵam qaıratkeri Ibragım Ábıbýllaev baıandama jasady.
Іs-shara sońynda Isataı Ábdikárimovulynyń qoljazbalarynan jınaqtalǵan jańa kitaptiń tanystyrylymy boldy.
Aıta keteıik, qaıratkerdiń ǵasyrlyq toıyn atap ótý aıasynda I.Ábdikárimov atyndaǵy Qyzylorda agrarlyq-tehnıkalyq joǵary kolledjindegi eskertkishke gúl shoqtaryn qoıý rásimi ótti. Munan ári arnaıy as beriledi.
