Syr dıqandary sý únemdeý tehnologııalaryn belsendi qoldana bastady

ASTANA. KAZINFORM — Qyzylorda oblysynda aýyl sharýashylyǵy ónimderiniń kólemi jyl saıyn artyp keledi. Bıyl bul kórsetkishti 234 mlrd 800 mln teńgege jetti. Bul týraly oblys ákimi Nurlybek Nálibaev aıtyp berdi. 

Ákimniń aıtýynsha, qazir 6 mlrd 400 mln teńge bolatyn 9 joba iske qosyldy.

— Sońǵy jyldary bolǵan sý tapshylyǵy áserin Syr dıqandary da sezinip otyr. Prezıdent tapsyrmasyna sáıkes, óńirde Premer-mınıstr bastaǵan Úkimet delegatsııasy arnaıy kelip, sharýalardyń jaǵdaıymen, egistiń jaı-kúıimen tanysty. Nátıjesinde Tótenshe jaǵdaılar mınıstrliginen 139 qyzmetkerden quralǵan jeke quram kómekke jetkizilip, 2 aı boıy sharýalarymyzdyń ıgiligi úshin úlken jumys istedi, — dedi N. Nálibaev elordada Ortalyq kommýnıkatsııalar qyzmetinde.

Memleket basshysynyń tapsyrmasymen Úkimet rezervinen Qyzylorda oblysyna 53 nasos qondyrǵysyn alý úshin 1 mlrd teńge qarjy bólingen. Der kezinde qabyldanǵan sheshimderdiń negizinde egis alqaptary tolyǵymen sýmen qamtylǵan.

Endi sý resýrstaryn barynsha tıimdi paıdalaný, sý únemdeý tehnologııalaryn engizý, sý júıelerin tsıfrlandyrý jumystary qolǵa alynǵan.

— Bıyl dıqandarymyz kúrish egistikteriniń 60 myń gektaryn lazerlik tegisteýden ótkizip, ónimdilikti 30 paıyzǵa arttyrdy. Prezıdent tapsyrmasymen óńirimizdiń egin sharýashylyǵyn ártaraptandyryp, sý únemdeý tehnologııasyn keńinen engizýge baǵyttalǵan memlekettik qoldaý sharalaryna aldaǵy 3 jylǵa 34 mlrd teńgeden astam qarjy bólindi. Kelesi jylǵa 10 mlrd teńge qarastyryldy. Bıyl sý únemdeý tehnologııalaryn paıdalaný kólemi 8 myń 100 gektarǵa jetkizilip, ótken jylmen salystyrǵanda 2 esege artty, — dedi N. Nálibaev.

Oblystyń 3 aýdanynda (Shıeli, Qazaly, Aral) sheteldik kompanııalardyń qatysýymen sý únemdeý tehnologııalaryn qoldaný arqyly júgeri, jońyshqa daqyldaryn egý boıynsha 3 iri joba júzege asyp keledi.

— Óńirimizde bıyl 189 myń 600 gektarǵa egin egildi. Onyń ishinde 80 myń 900 gektarǵa kúrish daqyly egildi. Búginde ár gektardan 58,1 tsentnerden ónim alynyp, 470 myń tonnaǵa jýyq astyq jınaldy, — dedi oblys ákimi.

Aıta keteıik, bıyl Qyzylorda oblysynyń bıýdjeti 851 mlrd teńgeden asty. Bıyl Qyzylordaǵa 750 mlrd teńgeden astam ınvestıtsııa tartylady. Buǵan deıin oblys ákimi Qyzylordada ınvestorlar qandaı iri zaýyttardy ashatynyn aıtqan edi.