Sıntetıkalyq kıimde bolatyn plastık talshyqtary muhıttarǵa zalal keltire bastady
ASTANA. QazAqparat - Sıntetıkalyq kıimdi jýý kezinde nemese qozǵalys ústindegi kólik dóńgeleginen bólinip, ushatyn plastıktiń mıkroskopııalyq talshyǵy álemdik muhıttyń lastanýynyń negizgi kózderiniń biri bolyp tabylady, deıdi ǵalymdar.
Keı jerlerde atalmysh plastık talshyqtary kózge kórinetin ózge lastaýysh zattarǵa qaraǵanda muhıttarǵa edáýir zalal keltirýde.
Halyqaralyq tabıǵatty qorǵaý odaǵynyń sońǵy esepteriniń birinde aıtylǵandaı, plastıktiń mıkrotalshyqtary muhıttardy lastaıtyn plastmassanyń jalpy kóleminiń 15-ten 31 paıyzyna deıin quraıdy. Sandyq mánde bul jylyna 9,5 mln tonna mıkroplastıka.
«Muhıttaǵy mıkrotalshyqtardyń basym bóligi sıntetıkalyq kıimdi jýýdan nemese dóńgelekten kelgen dep esepteımiz», - dedi Bı-bı-sımen áńgimelesý barysynda teńizderdiń lastanýy boıynsha baǵdarlama basshysynyń orynbasary Fransýa Sımar.
«Mıkrotalshyq qorektený tizbeginiń bólshegine aınaldy. Plastıka aǵynyn birlesip tejeıik», - dedi ekolog.
Zertteýshilerdiń aıtýynsha, mıkroplastıka kózderiniń taǵy biri - kosmetıka paıdalanýdan bolatyn qaldyqtar. Bul problema ishinara sheshilýde: Waitrose, John Lewis, Marks & Spencer jáne Body Shop sııaqty kóptegen iri brıtandyq bólshek jeliler plastıka qosylmaǵan kosmetıka men taýarlardy satýda. 2017 jyldyń sońynda birneshe iri kompanııa solardan úlgi almaq.
Alaıda, dóńgelektegi jáne kıimdegi plastıkti joıý kúrdelirek bolady dep sanaıdy ekologtar.
