Sıntetıkalyq esirtkilerdiń ınternet arqyly taratylǵany úshin jaýapkershilik kúsheıdi
Bul týraly QR Іshki ister mınıstrliginiń resmı ókili Nurdildá Oraz aıtty, dep habarlaıdy QazAqparat tilshisi.
Onyń aıtýynsha, Іshki ister mınıstri Erlan Turǵymbaev vedomstvonyń qurylymdyq jáne aýmaqtyq bólimsheleriniń basshylarymen beınekonferentsbaılanys rejıminde jedel keńes ótkizdi, onda Prezıdent Qasym-Jomart Toqaevtyń Qazaqstan halqyna Joldaýyn sapaly jáne ýaqtyly iske asyrý úshin birqatar mindetterdi belgiledi.
«Joldaýda esirtkiniń, onyń ishinde sıntetıkalyq esirtkiniń taralýyna baılanysty bolashaq urpaqtyń ál-aýqatyna qaýip tóngeni ataldy. Sondyqtan sıntetıkalyq esirtkilerdi baqylaýǵa engizý tetigi jeńildetildi, olardyń zańsyz jarnamasy men ınternet arqyly taratylǵany úshin jaýapkershilik kúsheıtildi. «Elektrondyq ámııandardy» anonımdi paıdalanýshylar arasynda aqsha aýdarýǵa tyıym salatyn túzetýler engizildi. Sonymen qatar, mınıstr esirtkiniń taralýyna, ásirese jastar arasynda taralýyna kúshti tosqaýyl qoıý úshin mınıstrlikti basqa organdarmen tyǵyz jumys istep, olardyń zańsyz aınalymy úshin jaýapkershilikti qatańdatý qajettigin atap ótti», - N. Oraz.
Onyń sózine qaraǵanda, keńeste qyzmetter men bólimsheler basshylarynyń azamattardyń zańdy quqyqtary men múddelerin iske asyrý úshin quqyq salasyndaǵy protsesterdi avtomattandyrýdyń mańyzdylyǵyna erekshe nazar aýdaryldy.
Aıta keteıik, Memleket basshysy óz Joldaýynda quqyq qorǵaý organdaryna esirtkiniń azamattar arasynda, ásirese jastardyń ishinde taralýyna barynsha tosqaýyl qoıýdy tapsyrdy.
