Sıntetıkalyq esirtki zatyn satý úshin «ICQ» men QIWI-ámııandy paıdalanǵan eki qylmystyq top quryqtaldy - ІІM
ASTANA. QazAqparat - «ICQ» arqyly tapsyrys qabyldap, QIWI-ámııan arqyly sıntetıkalyq esirtki zatyn satyp kelgen eki qylmystyq top quryqtaldy. Bul týraly búgin Іshki ister mınıstrliginde ótken baspasóz máslıhatynda Esirtki bıznesine qarsy kúres departamentiniń basshysy, ádilet general-maıory Sultan Kúsetov málimdedi.
Departament basshysynyń aıtýynsha, esirtki bıznesine qarsy kúres salasynda sońǵy ýaqytta ınternet resýrstaryn paıdalana otyryp, sıntetıkalyq esirtki zattaryn satý ózekti problemaǵa aınalyp bara jatyr. Qylmyskerler esirtki satýda tipti aqshanyń elektrondyq aýdarym júıesi - QIWI-ámııandardy da qoldanýǵa kóshken.
«Uzaq ýaqyt boıy atqarylǵan jumys nátıjesinde 30 shildede arnaıy qurylǵan saıt arqyly esirtki taratýmen úsh aı boıy aınalysqan eki qylmystyq top quryqtaldy. Qylmystyq top telekommýnıkatsııalyq jeli arqyly tapsyrys qabyldap, tólemdi joǵary tehnologııamen óte kúrdeli kombınatsııalar boıynsha esirtki ótkizýdiń san túrli ádisterin qoldanǵan. Olar «ICQ - messenger» jabyq hat almasý júıesin qoldanǵan. Bul júıe qorǵanysynyń «WhatsApp» jáne «Viber» qaraǵanda deńgeıi joǵary. Uıymdasqan qylmystyq top qylmystyq baılanystardy paıdalana otyryp, turaqty klıentterden «ICQ» arqyly tapsyrys qabyldap, sol arqyly oryndaǵan. Jetkizýshilerge senimdi toptan tekserilgen adamdar ǵana shyqqan. Soǵan qaramastan, muqııat jáne jedel ázirlený barysynda olardyń qylmystyq oılary áshkerelendi», - dedi Sultan Kúsetov.
Onyń sózine qaraǵanda, arnaıy operatsııa barysynda satý men jetkizý arnasyn uıymdastyrýshylar, deldaldar, sondaı-aq sıntetıkalyq esirtki satyp alatyn turaqty klıentterdiń aýqymy anyqtalǵan.
«Shildeniń 30-ynan 31-ine qaraǵan túni 20-30 jas aralyǵyndaǵy 11 adam ustaldy, onyń úsheýi er adam, toǵyzy áıelder. Kóbiniń bilimi joǵary, keıbiri Eýropada - Londonda jáne basqa da qalalarda oqyǵan. Olardan 27 gramm kokaın jáne «Ekstazıdyń» 40 tabletkasy tárkilendi. Esirtki tutynǵan bir qyzda allergııalyq reaktsııa bolyp, bet-júzi isinip ketti. Oǵan dereý alǵashqy kómek kórsetý úshin aýrýhanaǵa jetkizildi», - dedi S. Kúsetov.
Onyń sózine qaraǵanda, uıymdastyrýshylar men deldalǵa qatysty 4 qylmystyq is qozǵalǵan. Ustalǵandar ýaqytsha ustaý abaqtysyna qamalǵan. Al anyqtalǵan 30 esirtki paıdalanýshyǵa qatysty profılaktıkalyq jumys júrgizilgen.
