Sıntetıkalyq esirtkiniń kólemi kóbeıip barady - mınıstrlik

ASTANA. KAZINFORM – Jyl basynan beri elimizde 1,5 tonnaǵa jýyq túrli esirtki anyqtaldy. Bul týraly Іshki ister mınıstrliginiń resmı ókili Shyńǵys Alekeshev aıtty.

«Tárkilengen sıntetıkalyq preparattardyń kólemi artyp keledi. Eger 2018 jyly jalpy 5 keli jańa psıhoaktıvti zat tárkilense, byltyr bir tonnadan astam tárkilendi. Al bıyl úsh aıda 225 keli sıntetıkalyq esirtki tabyldy. Jalpy, bıylǵy birinshi toqsanda 1,5 tonnaǵa jýyq túrli esirtki anyqtalyp, onyń ishinde 946 keli marıhýana, 237 keli gashısh bar», - dedi Sh. Alekeshev mınıstrliktiń aptalyq baspasóz máslıhatynda.

Onyń aıtýynsha, 2019 jyldan bastap baqylaýdaǵy tizimge jańa psıhoaktıvti zattardy engizý tetigi jeńildetildi.

«Atap aıtqanda, buryn bir zatty esirtki retinde taný úshin zańǵa ózgeris engizý qajet edi. Sol sebepti bul protsess 1-2 jylǵa sozylatyn. Al oǵan deıin esirtkiniń jańa túrleri paıda bolyp úlgeretin. Endi esirtkiler tizimi Úkimettiń qaýlysymen retteledi. Sonymen qatar, qazir biz osy másele boıynsha vedomstvoaralyq kelisý rásimin jeńildetip jatyrmyz. «Sıntetıkanyń» jańa túrlerin esirtki retinde tez taný jedel áreket etýge jáne qylmyskerlerdi jaýapqa tartýǵa múmkindik beredi. Sol ýaqyttan bastap tizimge 125 jańa psıhoaktıvti zat pen 29 prekýrsor engizildi. Sıntetıkalyq esirtki óndirý úshin paıdalanylatyn 19 jabdyqtyń ataýy memleket baqylaýyna alyndy», - dedi resmı ókil.