Sıntetıkalyq esirtkini zertteıtin 24 keshen satyp alynady
ASTANA. KAZINFORM – Sıntetıkalyq esirtkini zertteıtin 24 zamanaýı saraptamalyq-zertteý kesheni satyp alynady. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Esirtki quraldaryna saraptama júrgizetin «Ádilet mınıstrliginiń Sot saraptamalary ortalyǵy» respýblıkalyq memlekettik qazynalyq kásipornynyń ár óńirde 20 aýmaqtyq bólimshesi bar. Ortalyqtyń aýmaqtyq bólinisteri esirtkiniń jańa túrlerin anyqtaýǵa múmkindik beretin analıtıkalyq jabdyqtardyń eń mınımaldy qajetti jıyntyǵymen jabdyqtalǵan (mass-spektrometrııalyq detektorlary bar gaz hromatograftary, jalyndyıondaný detektory bar gaz hromatograftary jáne IQ-Fýre spektrometrleri). 2023 jyly Úkimet ortalyqtyń bólimshelerin materıaldyq-tehnıkalyq jaraqtandyrýdy jetildirý jónindegi 2024-2025 jyldarǵa arnalǵan jol kartasyn bekitti Ony Ádilet mınıstrligi ákimdiktermen birge iske asyrady. Bul jol kartasynda aýmaqtyq bólimsheler úshin saraptamalyq jabdyq satyp alý josparlanǵan», - dedi Úkimet basshysy jaýabynda.
Oljas Bektenovtiń dereginshe, bıyl jol kartasy aıasynda jalpy somasy 4 mlrd teńgege 8 birlik zerthanalyq jabdyq satyp alyndy. Osy jyldyń sońyna deıin taǵy 1 birlik jetkizilmek.
«Budan basqa, osy bólinisterdi odan ári tehnıkalyq jaraqtandyrý maqsatynda keshendi josparda sıntetıkalyq esirtkini zertteý boıynsha 24 zamanaýı saraptamalyq-zertteý keshenin satyp alý kózdelgen. Nátıjesinde bıyl qyrkúıekten bastap ortalyqtyń bólimshelerinde esirtkiniń zattarynyń keıbir túrleri boıynsha saraptama júrgizý merzimi 1 táýlikke deıin qysqartyldy», - dedi ol.
Aıta keteıik, sońǵy 2 jylda elimizde 123 esirtki zerthanasy joıyldy.
