Esirtki saýdasynan túsken kiristi zańdastyrǵan kúdikti Grýzııadan ekstradıtsııalandy
ASTANA. KAZINFORM - Qazaqstan Respýblıkasynyń Bas prokýratýrasy men Іshki ister mınıstrliginiń Interpol qyzmetkerleri Qazaqstannyń Grýzııadaǵy Elshiliginiń qoldaýymen atalǵan elden asa iri mólsherde psıhotroptyq zattardyń zańsyz aınalymymen, sondaı-aq qylmystyq kiristerdi zańdastyrýmen aınalysatyn uıymdasqan qylmystyq topqa qatysqany úshin qylmystyq jaýapkershilikke tartý maqsatynda Qazaqstan azamatyn ekstradıtsııalady.
QR Bas prokýratýrasy baspasóz qyzmetiniń habarlaýynsha, atalǵan adam qylmystyq toptyń múshesi bola otyryp, Almaty oblysy aýmaǵynda asa iri kólemde esirtki óndirisin uıymdastyrǵan. Keıinnen daıyndalǵan psıhotroptyq zattardyń tektesteri osy oblys pen Almaty qalasynyń aýmaǵynda jasyryn túrde taratylǵan.
Tergep-tekserý barysynda qylmystyq toptan 10 kelige jýyq psıhotroptyq zattar (mefedron) alyndy.
Qylmystyq áreket nátıjesinde alynǵan zańsyz kiristi qaskúnemder 1,8 mlrd teńgeden astam somada ártúrli qarjylyq operatsııalar, onyń ishinde krıptoalmastyrǵyshtardy paıdalana otyryp, qosymsha 600 mıllıon teńgeden astam somaǵa jyljymaıtyn múlikti, bıznes obektilerin jáne kólik quraldaryn satyp alý arqyly zańdastyrǵan. Bul aktıvterge memleket paıdasyna aýdarý maqsatynda tyıym salyndy.
Qazirgi ýaqytta qylmystyq top músheleriniń bir bóligi sotqa berilip, olar boıynsha sot talqylaýy júrgizilp jatyr, al onyń keıbir músheleri, onyń ishinde kúdikti qylmystyq qýdalaý organdarynan jaltaryp, halyqaralyq izdestirýge jarııalanǵan.
Bıylǵy qańtarda ol Grýzııa aýmaǵynda ustalyp, ol jerden Bas prokýratýranyń suraýy boıynsha Qazaqstanǵa berildi.
-Qazirgi tańda tulǵa tergeý ızolıatoryna qamaldy. Oǵan taǵylǵan qylmystardy jasaǵany úshin múlki tárkilenip, 20 jylǵa deıingi merzimge bas bostandyǵynan aıyrý túrindegi jaza kózdelgen,-delingen habarlamada.
Osyǵan deıin Túrkııada tórt jyldan beri halyqaralyq izdeýde júrgen qazaqstandyq ustalǵany týraly jazdyq.
