Sıntetıkalyq esirtkilerdiń taralýy alańdatarlyq deńgeıge jetti

ASTANA.KAZINFORM – Astanada esirtki qylmystarynyń basym bóligi sıntetıkalyq zattarǵa tıesili. Olar kóbine jasyryn narkolaboratorııalarda daıyndalyp, ınternet arqyly satylady. Bul týraly Astana qalasy Polıtsııa departamentiniń Esirtki qylmysyna qarsy is-qımyl basqarmasynyń bastyǵy mindetin ýaqytsha atqarýshy Erkesh Bilimuly Qalyqov málimdedi.

– Elordada 2025 jyldyń basynan beri 267 esirtki qylmysy tirkeldi. 2024 jyly – 202, 2023 jyly – 95 derek anyqtalǵan. Bıylǵy derekterdiń ishinde 215-i satý faktileri. Zańsyz aınalymnan 399 keliden astam esirtki tárkilendi. Onyń ishinde 30 keliden astamy – sıntetıkalyq esirtki, 263 keliden astamy – marıhýana, 97 kelisi – gashısh. Bul ótken jylmen salystyrǵanda 286 kelige artyq, – dedi ol.

Sonymen birge, polıtsııa qyzmetkerleri úsh uıymdasqan qylmystyq toptyń jáne bir narkolaboratorııanyń qyzmetin toqtatty. Tergeý dereginshe, qylmystyq top músheleri esirtkini ınternet arqyly satqan. Uıymdastyrýshylar men qatysýshylar ýaqytsha ustaý ızolıatoryna qamaldy.

– Bıyl aýyr esirtki qylmystarynyń sany da ósti – 150 derek tirkeldi. Bul 2025 jylǵy 3 naýryzda kúshine engen zańnamalyq ózgeristermen baılanysty. Soǵan sáıkes, keıbir qylmystardyń jazasy 15 jyldan 12 jylǵa qysqartyldy, al «asa aýyr» sanatynan «aýyr» sanatyna aýystyrylǵan baptar boldy, – dep tolyqtyrdy Erkesh Qalyqov.
Bıyl esirtki jarnamasyna qatysty 11 qylmystyq is, esirtki daqyldaryn ósirýge qatysty 3 is jáne kontrabandaǵa baılanysty 1 is qozǵalǵan.

Buǵan deıin, Qazaqstanda esirtki bıznesine qarsy kúres kúsheıgenin jazǵanbyz.