Sıntetıkalyq esirtki saýdalaǵan BQO turǵyny 10 jylǵa sottaldy

ATYRAÝ. KAZINFORM — Atyraýda sıntetıkalyq esirtkini jasyryn satpaq bolǵan BQO turǵyny 10 jylǵa bas bostandyǵynan aıyryldy. Odan tárkilengen esirtkiniń quny shamamen 25 mln teńgeni quraǵan. 

Atyraý oblystyq polıtsııa departamenti baspasóz qyzmetiniń málimetinshe, kórshi óńir turǵyny byltyr maýsymda ustalǵan.

«Esirtki qylmysyna qarsy is-qımyl basqarmasynyń qyzmetkerleri ótken jyly Atyraý qalasyna kelip, esirtki zattaryn jasyryn tyǵý arqyly saýdalaǵan Batys Qazaqstan oblysynyń 29 jastaǵy turǵynyn anyqtap, ustaǵan edi. Tekserý jumystary kezinde kúdiktiden qara naryqtaǵy quny shamamen 25 mln teńgeniń 1700-ge jýyq doza sıntetıkalyq esirtkisi tárkilendi. Kúdiktige qatysty qylmystyq is tirkelip, sotqa deıingi tergeý júrgizildi. Kúdiktiniń qylmystyq iske qatysty kinási tolyq dáleldendi. Ol turmystyq jaǵdaıy nasharlap, nesıe qaryzyn óteý úshin jumys izdegen. Alaıda, turaqty jumys taba almaı, Telegram arnasynda esirtki zatyn jasyryn ádispen taratýshy bolǵanyn moıyndady», - dep habarlady departamenttiń baspasóz qyzmeti.

Qylmystyq is Atyraý oblysynyń qylmystyq ister jónindegi mamandandyrylǵan aýdanaralyq sotyna joldandy. Sot úkimimen Batys Qazaqstan oblysynyń turǵyny 10 jylǵa bas bostandyǵynan aıyryldy.

Eske sala ketelik, buǵan deıin BQO men Aqmola oblysynyń turǵyny Atyraýda esirtkini tyǵyp satpaq bolǵanyn jazǵan edik.

Sondaı-aq, Atyraýda kórshi óńir turǵyndarynan esirtki men tapansha tárkilengenin habarlaǵan bolatynbyz.

Al, keshe sıntetıkalyq esirtki saqtady dep aıyptalǵan atyraýlyqtan tapansha men pyshaq tabyldy.