Sıntetıkalyq esirtki satý: transulttyq qylmystyq topty basqarǵan kúdikti Polshadan ekstradıtsııalandy
ASTANA.KAZINFORM - Qazaqstan Bas prokýratýrasy men Іshki ister mınıstrligi Interpolynyń qyzmetkerleri Qazaqstannyń Polsha Respýblıkasyndaǵy Elshiliginiń járdemdesýimen kúdiktini ekstradıtsııalady.
Kúdikti esirtki quraldary men psıhotroptyq zattardyń zańsyz aınalymymen aınalysqan transulttyq qylmystyq topty uıymdastyrǵany jáne oǵan basshylyq etkeni úshin, sondaı-aq qylmystyq kiristerdi zańdastyrý úshin Ýkraına azamatyn qylmystyq jaýaptylyqqa tartý úshin ekstradıtsııalandy.
Arnaıy prokýrorlar qylmystyq isti tergeý barysynda atalǵan tulǵa transulttyq qylmystyq toptyń basshysy bola otyryp, Telegram messendjerinde Kaef Mafia ınternet-dúkeni arqyly esirtki jáne psıhotroptyq zattardy júıeli túrde baılanyssyz satýdy uıymdastyrǵanyn anyqtady.
Qylmystyq áreket nátıjesinde bank shottary arqyly 2,8 mlrd teńgeden astam qarajat ótkizildi, olar Qazaqstannan tys jerge shyǵaryldy. Biraq keıinnen qabyldanǵan sharalar arqyly memleket paıdasyna tárkilendi.
Sonymen qatar jedel is-sharalar barysynda osy qylmystyq top múshelerinen 1,2 kg esirtki jáne psıhotroptyq zattar alyndy.
Qylmys jasalǵannan keıin top músheleriniń bir bóligi sottaldy, al kúdikti uıymdastyrýshy bola otyryp, qylmystyq qýdalaý organdarynan jasyrynǵan, osyǵan baılanysty halyqaralyq izdeý jarııalandy.
Ótken jyldyń jeltoqsanynda ol Polsha aýmaǵynda ustaldy. Sol jerden Bas prokýratýranyń suraýy boıynsha Qazaqstanǵa ekstradıtsııalandy.
Qazir ol tergeý ızolıatoryna qamaldy. Oǵan aıyp taǵylǵan qylmystar úshin múlki tárkilenip, 20 jylǵa deıin bas bostandyǵynan aıyrý jazasy kózdelgen.
