Sıntetıkalyq esirtki satqan 43 jastaǵy atyraýlyq 10 jylǵa sottaldy

Atyraý oblysynyń 43 jastaǵy turǵyny sıntetıkalyq esirtkiniń asa kóp mólsherdegi dozasyn satýmen aınalysqan. Kúdikti byltyrǵy maýsymda ustalyp, odan 3,5 mln teńgeniń esirtkisi tárkilengen.  

Atyraý oblystyq polıtsııa departamentiniń baspasóz qyzmetinen málim etkendeı, kúdikti esirtkini ınternet jelisi arqyly satqan.

«Esirtki qylmysyna qarsy is-qımyl basqarmasy qyzmetkerleri ótken jyldyń maýsym aıynda Atyraý qalasynyń aýmaǵynda ınternet jelisi jáne jasyryn tyǵý ádisi arqyly sıntetıkalyq esirtki zattaryn asa iri mólsherde satýmen aınalysyp júrgen 43 jastaǵy kúdiktini ustady. Tekserý kezinde kúdiktiden 200 doza «Alfa-PVP» sıntetıkalyq esirtkisi tárkilendi. Esirtkiniń quny 3,5 mln-ǵa jýyq teńgeni qurady», - dep habarlady departamenttiń baspasóz qyzmeti.

Kúdiktige qatysty qylmystyq is qozǵalyp, sotqa deıingi tergeý júrgizilgen. Kúdiktiniń qylmystyq quqyq buzýshylyq jasaýdaǵy kinási tolyq dáleldengen.

«Tergeý kezinde kúdiktiniń Telegram qosymshasy arqyly asa iri mólsherde psıhotroptyq zattardy ótkizý, satyp alý jáne saqtaýmen aınalysatyn jumys izdep tapqany anyqtaldy. Kúdiktiniń sıntetıkalyq esirtkini paıdalanǵany tolyq dáleldendi. Atyraý oblysynyń qylmystyq ister jónindegi mamandandyrylǵan aýdanaralyq sotynyń úkimimen 43 jastaǵy er adamdy 10 jylǵa bas bostandyǵynan aıyryldy», - dep málim etti departamenttiń baspasóz qyzmetinen.

Eske sala ketelik, budan buryn Atyraý oblysynda bir jylda 65 esirtki qylmysy tirkelgenin jazǵan bolatynbyz.

Sondaı-aq Atyraý túrmesinde esirtki qylmysymen sottalǵan 33 áıel jazasyn ótep júrgenin habarlaǵan edik.